Ով կփորձի բաժանել Թայվանը Չինաստանից, մաս-մաս կլինի և կինքնաոչնչացվի. Չինաստանի պաշտպանության նախարար
Չինաստանի պաշտպանության նախարար Դուն Ջունը նախազգուշացրել է՝ ով կփորձի բաժանել Թայվանը Չինաստանից, «մաս-մաս կլինի և կինքնաոչնչացվի»։ Այս մասին նա ասել է Սինգապուրում կայացած «Շանգրի Լա երկխոսություն» համաժողովում, մեջբերում է RTHK-ն։
Դուն Ջունը Թայվանի իշխող Դեմոկրատական առաջադիմական կուսակցությանը մեղադրել է «ապաչինականացման» համար։ Նախարարը նշել է, որ արտաքին ուժերը «շարունակում են թուլացնել «մեկ Չինաստան» սկզբունքը՝ առաջ քաշելով Թայվանի հետ կապված օրինագծերը և շարունակելով Թայվանին զենք վաճառել»։
Նրա խոսքով՝ արտաքին ուժերը ցանկանում են օգտագործել կղզին, որը Պեկինը համարում է անջատված նահանգ, ՉԺՀ-ին զսպելու համար՝ դրանով իսկ «վտանգի ենթարկելով Թայվանը»:
Դուն Ջունն ընդգծել է, որ Պեկինը միշտ հավատարիմ է եղել խաղաղ վերամիավորմանը, սակայն այդ հեռանկարը խաթարվում է Թայբեյի անկախության ձգտումով, ինչպես նաև արտաքին ուժերի կողմից:
«Չինական բանակը միշտ եղել է անպարտելի և հզոր ուժ և ժամանակին և վճռական գործողություններ կձեռնարկի Թայվանի անկախության կողմնակից ուժերին զսպելու և ապահովելու, որ այդ ջանքերը երբեք հաջողություն չունենան», - սպառնացել է նա:
Չինաստանի պաշտպանության նախարարությունն արդեն հայտարարել էր, որ Թայվանի ղեկավարությունը մոտենում է «պատերազմի վտանգավոր շեմին»՝ «երկու պետությունների տեսության բացահայտ քարոզչության» պատճառով։
Թայվանում մայիսին տեղի է ունեցել նոր նախագահ Լայ Ցինդեի երդմնակալությունը։ Պեկինը զգուշացրել է, որ նրա ընտրությունը կմեկնաբանվի որպես ընտրություն հօգուտ պատերազմի։
Չինաստանը Թայվանը համարում է իր անօտարելի տարածքը. Թայբեյը, որն իր անկախությունը հռչակել է 1949 թվականին, կտրականապես մերժում է «մեկ երկիր, երկու համակարգ» մոդելը, որը Պեկինը առաջ է քաշել 1980-ականներից ի վեր: