Ադրբեջանը զգուշացրել է Ֆրանսիային՝ Հայաստանին զենք վաճառելու կապակցությամբ
Ադրբեջանի ՊՆ-ն հայտարարել է․ «Անտեսելով Բաքվի նախազգուշացումը, Ֆրանսիան Հայաստանին հարձակողական հրետանային տեխնիկա և այլ զինատեսակներ է տրամադրում, ինչը Հարավային Կովկասի տարածաշրջանում Ֆրանսիայի սադրիչ գործողությունների հերթական օրինակն է»։
Հայտարարության մեջ ասված է․ «Թեև անցած տարի Ֆրանսիայի ՊՆ-ն հայտարարեց, որ Հայաստան ուղարկվող զինտեխնիկան պաշտպանական բնույթ է կրում, սակայն երկու երկրների միջև ստորագրված փաստաթղթի համաձայն՝ Հայաստանին տրամադրվում է հարձակողական զենք, ինչը Փարիզի իշխանությունների կեղծավորության հերթական դրսևորումն է։
Մակրոնի կառավարությունը, որը հետևում է Հարավային Կովկասի տարածաշրջանում ռազմական և աշխարհաքաղաքական ինտրիգների քաղաքականությանը, խոչընդոտ է Հայաստանի և Ադրբեջանի միջև հակամարտության կարգավորման և տարածաշրջանում կայուն խաղաղության ապահովման ճանապարհին»։
Ադրբեջանի ՊՆ հայտարարության մեջ նաև ասված է․ «Ֆրանսիայի ներկայիս ղեկավարությունը հեռացել է կարգավորման և տարածաշրջանային գործընթացից և վարում է ապակառուցողական ու կողմնակալ քաղաքականություն։ ՄԱԿ-ի ԱԽ մշտական անդամ Ֆրանսիայի կողմից Հայաստանի զինումը, ինչն օգնում է Հայաստանի ղեկավարության չարամիտ քաղաքականությանը, և՛ քաղաքական անպատասխանատվություն է, և՛ ճանապարհ դեպի նոր պատերազմ»։