Ջուլիան Ասանժը մասնակցել է Սիդնեյի բազմահազարանոց պաղեստինամետ բողոքի ակցիային
Կիրակի օրը տասնյակ հազարավոր պաղեստինամետ ցուցարարներ, այդ թվում՝ WikiLeaks-ի հիմնադիր Ջուլիան Ասանժը, երթով անցել են Սիդնեյի Հարբոր կամրջով՝ փակելով աշխարհահռչակ տեսարժան վայրը, հայտնում է AFP-ն։
Ասանժը, որն անցյալ տարի վերադարձել էր Ավստրալիա բրիտանական խիստ ռեժիմի բանտից ազատվելուց հետո, լուսանկարվել է ընտանիքի շրջապատում՝ երթի ժամանակ Ավստրալիայի նախկին արտգործնախարար և Նոր Հարավային Ուելսի վարչապետ Բոբ Կարի կողքին քայլելիս։
Չնայած ուժեղ քամուն և անձրևին, պաղեստինամետ ցուցարարների ամբոխը երթով անցել է կամրջով՝ վանկարկելով «Անհապաղ դադարեցրեք կրակը» և «Ազատություն Պաղեստինին»։
Նոր Հարավային Ուելսի ոստիկանությունը հայտարարել է, որ ամբողջ Սիդնեյում երթին մասնակցելու համար հարյուրավոր լրացուցիչ աշխատակիցներ են ուղարկվել։
Վերջին շաբաթներին Ֆրանսիան, Մեծ Բրիտանիան, Կանադան և մի շարք այլ երկրներ հայտարարել են, որոշ դեպքերում՝ վերապահումներով, Պաղեստին պետությունը դիվանագիտորեն ճանաչելու մտադրության մասին, քանի որ Գազայում սովի կապակցությամբ միջազգային անհանգստությունն ու քննադատությունն աճել են։
Ավստրալիան կոչ է արել դադարեցնել պատերազմը Գազայում, սակայն առայժմ ձեռնպահ է մնացել Պաղեստին պետությունը ճանաչելու որոշում կայացնելուց։ Սակայն երեքշաբթի օրը ավելի քան մեկ տասնյակ այլ երկրների հետ համատեղ հայտարարության մեջ նա հայտնել է «Պաղեստին պետությունը ճանաչելու պատրաստակամության մասին»։
