Իրանի գործողությունները՝ Եվրոպայի կողմից «Ձգանի մեխանիզմն» ակտիվացնելու դեպքում

Իրանի իսլամական խորհրդարանի պատգամավորը ներկայացրել է Թեհրանի գործողությունները, եթե եվրոպացիներն ակտիվացնեն «Ձգանի մեխանիզմը» (ՄԱԿ-ի պատժամիջոցների վերականգնում)։

Մեծ Բրիտանիան, Ֆրանսիան և Գերմանիան, ՄԱԿ-ի գլխավոր քարտուղարին ուղղված վերջին նամակում, կրկնել են Իրանի վերաբերյալ նախկին պնդումները, և նշել, որ պատրաստվում են    ակտիվացնել «Ձգանի մեխանիզմը», եթե Իրանը չվերսկսի իր միջուկային ծրագրի վերաբերյալ բանակցությունները Միացյալ Նահանգների հետ։
Որո՞նք են լինելու Իրանի քայլերն այս մեխանիզմի ակտիվացման դեպքում
Մեջբերելով  Khabar Online կայքը, Pars Today-ը հաղորդում է, որ Ահմադ Նադերին ասել է. «Եթե եվրոպացիները շարունակեն ճնշման մեծացման քաղաքականությունը, Իրանը  կձեռնարկի անհրաժեշտ և համապատասխան միջոցներ»։
Նա նշել է․ «Այդ քայլերից է Միջուկային զենքի չտարածման մասին պայմանագրից դուրս գալը։  Այս երկրների ղեկավարները պետք է իմանան, որ իրենց սկսած խաղը ձախողվել է, և Իսլամական Հանրապետությունը մի քանի խաղաքարտեր է պահել իր համար, որոնք կօգտագործի»։
Ամերիկյան Stimson վերլուծական կենտրոնը գրել է, որ դեպի Ասիա շրջադարձը կարող է օգնել Իրանին նվազեցնել արևմտյան երկրների տնտեսական ճնշումը։
ԻԻՀ ԱԳ նախարար  Աբբաս Արաղչին վերջերս անդրադարձել է մեխանիզմը գործարկելու սպառնալիքներին, նշելով. «Եվրոպացիները լիազորություններ չունեն խոսելու և իրականացնելու ՀԳՀԾ-ի որևէ կետ, այդ թվում՝ «Ձգանի մեխանիզմի» գործարկումը։ Մեր ու Եվրոպայի միջև կա իրավական մարտահրավեր»:
 Նա հավելել է. «Դրա համար կան տարբեր գործիքներ, և մենք աշխատում ենք Չինաստանի և Ռուսաստանի հետ: Եթե նրանք գործարկեն մեխանիզմը, մենք ունենք արձագանքելու գործիքներ, որոնց մասին կհայտարարվի համապատասխան ժամանակին»:
Հուլիսին Ստամբուլում կայացած հանդիպումից հետո, Արաղչին Financial Times-ին ասել էր, որ Եվրոեռյակը չունի «իրավական կամ բարոյական իրավունք»՝ մեխանիզմն ակտիվացնելու համար։
Իրանի խորհրդարանի մեկ այլ պատգամավոր՝ Քամրան Ղազանֆարին, «Ձգանի մեխանիզմն ակտիվացնելու» Իրանի արձագանքի մասին ասել է. «Այս դեպքում Իրանը պետք է դուրս գա Միջուկային զենքի մասին համաձայնագրից՝ ցույց տալու համար, որ դատարկաձեռն չէ։ Վերջիվերջո, կտուժեն արևմտյան կողմերը, քանի որ նրանք կարող էին վերահսկել մեր միջուկային ծրագիրը ՄԱԳԱՏԷ-ի միջոցով՝ մինչև Սիոնիստական ռեժիմի կողմից Իրանի դեմ պարտադրված պատերազմը։ Բայց եթե Իրանը դուրս գա Միջուկային զենքի մասին համաձայնագրից և դադարեցնի ՄԱԳԱՏԷ-ի հետ իր համագործակցությունը, Իրանի միջուկային ծրագրի կարգավիճակը կդառնա անհասկանալի Արևմուտքի համար»։
Վերջին տարիներին Եվրոպան հյուրընկալել է հակաիրանական ահաբեկչական և անջատողական խմբավորումների և առանց իրավական հիմքերի բանտարկել  Իրանի քաղաքացիներին, ինչն արժանացել է Թեհրանի կոշտ քննադատությանը։ 
Քաղաքական փորձագետները կարծում են, որ եթե «Ձգանի մեխանիզմն» ակտիվանա, Իրանը կարող է ավելի ակտիվ  դիմակայել եվրոպական լրտեսական և ահաբեկչական ծրագրերին, միաժամանակ փորձելով կառավարել լարվածությունը և տարածաշրջանային հավասարումները վերադարձնել դիվանագիտական ուղի։