Հունաստանում լրագրողները 24-ժամյա գործադուլ են անում
Հույն լրագրողները փետրվարի 3-ին 24-ժամյա գործադուլ են անում՝ ի նշան բողոքի ապահովագրության համակարգի բարեփոխման հետ կապված կառավարության ծրագրերի դեմ: Այս մասին հայտնում է korrespondent.net-ը:
Հունաստանի ԶԼՄ-ները հայտարարել են աշխատողների համընդհանուր 24-ժամյա գործադուլին միանալու մասին, որը երկրի խոշորագույն արհմիությունները ծրագրել են անել հինգշաբթի օրը:
Սակայն առաջիկա բողոքի ակցիաները լուսաբանելու համար լրագրողներն իրենց բողոքի ակցիան անցկացնում են մեկ օր շուտ՝ չորեքշաբթի ժամը 6:00-ից մինչև հինգշաբթի ժամը 6:00-ը:
Գործադուլին կմասնակցեն բոլոր պետական և մասնավոր ԶԼՄ-ները՝ թերթերը, հեռուստաալիքները, ռադիոները: Ակցիային միացել են նաև ռադիոյի և հեռուստատեսության տեխնիկական աշխատողները:
Հունական ԶԼՄ-ները պահանջում են պահպանել Հրատարակիչների, խմբագիրների և մամուլի աշխատողների ապահովագրական հիմնադրամը որպես զանգվածային լրատվության միջոցների անկախ հիմնադրամ՝ ոլորտի բոլոր կատեգորիաների աշխատողների մասնակցությամբ:
