The Economist. 2026 թվականը համաշխարհային կարգի և տնտեսության վերափոխման տարի է
2025 թվականի լարված զարգացումների վերլուծության մեջ The Economist ամսագիրը կանխատեսում է, որ 2026 թվականը շրջադարձային կլինի նոր համաշխարհային կարգի ձևավորման և միջազգային տնտեսության ուղու վերաիմաստավորման գործում։
Ըստ ամսագրի՝ իր նախագահության երկրորդ շրջանում Դոնալդ Թրամփի քաղաքականությունը հիմնարար կերպով փոխել է ոչ միայն գլոբալ հավասարումները, այլև Միացյալ Նահանգների ներքին կառուցվածքները։
The Economist-ն, անդրադառնալով Միացյալ Նահանգներում գործադիր իշխանության աննախադեպ աճին, նշում է այնպիսի միջոցառումներ, ինչպիսիք են համալսարանների վրա ճնշումը, Դաշնային պահուստային համակարգի անկախության թուլացումը, կառավարական կառույցների գործիքային օգտագործումը հակառակորդների դեմ և Վաշինգտոնի կողմից միջազգային պարտավորությունների կրճատումը. միտում, որը լուրջ հարցեր է առաջացրել ամերիկյան ժողովրդավարության ապագայի վերաբերյալ։
Միևնույն ժամանակ, Թրամփի գործարքային արտաքին քաղաքականությունը ավանդական դաշինքները վերածել է պայմանական և մեծածախս հարաբերությունների և խաթարել է բազմակողմ առևտրային համակարգը՝ ծանր սակագնային ցնցումներով։
Թրամփի վարչակազմի գործունեությունը գնահատելիս The Economist-ը խոսում է հաջողությունների և ձախողումների համադրության մասին։ Գազայի հրադադարը և ՆԱՏՕ-ի պաշտպանական բյուջեի ավելացումը նվաճումներ են, սակայն Հնդկաստանի և Բրազիլիայի նման երկրների հետ առևտրային լարվածության սրումը իրականում նրանց ավելի է մոտեցրել Չինաստանին և Վաշինգտոնի համար դժվարացրել տնտեսական մրցակցությունը Պեկինի հետ։
Տնտեսական ոլորտում ԱՄՆ ֆոնդային շուկան բում է ապրել՝ ապակարգավորման, արհեստական բանականության և կրիպտոարժույթների ներդրումների շնորհիվ, սակայն սակագների գնաճային ճնշումը և բյուջեի դեֆիցիտի աճը խաթարել են հանրային վստահությունը։
2026 թվականին Դաշնային պահուստային համակարգի հաջորդ նախագահի ընտրությունը նույնպես կարևոր փորձություն կլինի կենտրոնական բանկի անկախության համար։
The Economist-ն ընդգծում է, որ հին կարգի աստիճանական փլուզման հետ մեկտեղ, 2026 թվականը կլինի արևմտյան ժողովրդավարությունների ճգնաժամի, աշխարհաքաղաքական վերադասավորման և նոր աշխարհակարգի հիմնական գծերի ձևավորման տարի. կարգ, որտեղ Ամերիկայի դիրքն այլևս ակնհայտ և անվիճելի չի լինի։