Ադրբեջանի ԱԳ նախարարը չի բացառել իր այցը Հայաստան
Ադրբեջանի ԱԳ նախարար Ջեյհուն Բայրամովը չի բացառել իր այցը Հայաստան:
«Իմ այցը Հայաստան հնարավոր է, եթե դա պահանջում են Ադրբեջանի ազգային շահերը»,-ասել է նա տարեվերջյան մամուլի ասուլիսում:
Խոսելով երկրների միջև խաղաղության համաձայնագրի հնարավոր ստորագրման մասին՝ պաշտոնյան կրկին հնչեցրել է ՀՀ Սահմանադրությունը փոխելու պահանջը, ինչպես նաև հայտարարել Է, որ Երևանը «պետք է կատարի TRIPP նախագծի շրջանակներում ստանձնած պարտավորությունները»:
Վերջերս Ադրբեջանից բենզինի խմբաքանակի ներկրման համատեքստում Բայրամովը հնարավոր է համարել երկրների միջև նոր առևտրային գործարքների իրականացումը:
«Խոսքը չի վերաբերում երկու երկրների միջև ռազմական արտադրանքի առևտրին, բայց այլ ոլորտներում առևտուրը հնարավոր է։ Այդ գործընթացները կարող են տեղի ունենալ ըստ մեր ակնկալիքների», – ասել է նա։
Անդրադառնալով Գաբալայում նոյեմբերի վերջին տեղի ունեցած սահմանագծման հանձնաժողովների վերջին նիստին՝ Բայրամովը հայտարարել է, որ նման հանդիպումներ կարող են տեղի ունենալ նաև Հայաստանում:
Հիշեցնենք, որ դեկտեմբերի 19-ին Ադրբեջանից Վրաստանով տարանցմամբ Հայաստան է ժամանել 22 վագոնից բաղկացած երկաթուղային գնացքը՝ 1218 տոննա բենզինի ընդհանուր ծավալով: Էկոնոմիկայի նախարար Գևորգ Պապոյանը հայտարարել է, որ այդ մատակարարումը անկախության ժամանակահատվածում Հայաստանի և Ադրբեջանի միջև առաջին ուղղակի առևտրային գործարքն էր:
