ԷլԲարադեյ. Գազայի ապագայի վերաբերյալ Թրամփի ծրագրերը ապարդյուն են
ՄԱԳԱՏԷ-ի նախկին գլխավոր տնօրեն Մոհամմեդ ԷլԲարադեյը ԱՄՆ նախագահի կողմից Գազայի հատվածի ապագայի վերաբերյալ ներկայացված ծրագրերը որակել է որպես «ապարդյուն» և ասել, որ այդ առաջարկները ոչ միայն չեն ապահովում պաղեստինցիների իրավունքներն, այլև գտնվում են այնպիսի շրջանակներում, որը գործնականում տեղ չի թողնում անկախ պաղեստինյան պետության ձևավորման համար։
Pars Today-ի փոխանցմամբ՝ ԷլԲարադեյն X-ում արած գրառման մեջ քննադատել է գերիշխող սիոնիստական դիսկուրսը և նշել, որ այս պատմությունը հիմնված է այն պնդման վրա, որ «գետից մինչև ծով» հողը պատկանում է Իսրայելին, և նման շրջանակներում անտեսվում է պաղեստինցիների ինքնորոշման իրավունքը։
Անդրադառնալով արաբական և իսլամական երկրների արձագանքին, նա հավելել է, որ դրանք հիմնականում սահմանափակվում են բանավոր դատապարտումներով, և, ի վերջո, միջազգային հանրությունից պահանջվում է ավելի մեծ պատասխանատվություն ստանձնել։ Էլ Բարադեյը զգուշացրել է Գազայի ապագայի վերաբերյալ որոշ ծրագրերի, այդ թվում՝ բնակիչների հարկադիր տեղահանման և տարածքը զբոսաշրջային կենտրոնի վերածելու մասին, և ընդգծել, որ նույնիսկ եթե դրանք իրականացվեն, նման գաղափարները օգուտ չեն բերի պաղեստինցի ժողովրդին։