Լարվածության սրմանը զուգահեռ Եվրոպայում միջուկային զսպման միտումը մեծանում է
Եվրոպայում անվտանգության լարվածության աճի և Ուկրաինայում պատերազմի շարունակվելու ֆոնին, որոշ եվրոպական երկրներում ակտիվացել են միջուկային զսպման ամրապնդման և ԱՄՆ անվտանգության հովանոցից կախվածությունը նվազեցնելու վերաբերյալ քննարկումները։ Իսկ դա կարող է փոխել Կանաչ մայրցամաքի անվտանգության հավասարումները։
Fars գործակալության փոխանցմամբ՝ Լեհաստանի նախագահն, անդրադառնալով Ռուսաստանից եկող սպառնալիքներին, հայտարարել է, որ Վարշավան պետք է օրակարգում դնի միջուկային պաշտպանության կարողությունների զարգացումը և վերանայի իր անվտանգության ռազմավարությունը՝ հիմնվելով միջուկային կարողությունների վրա։ Կարոլ Նավրոցկին ընդգծել է, որ Լեհաստանը, որպես Ուկրաինայի պատերազմին հարակից երկիր, գտնվում է սպառնալիքների առաջնագծում և չի կարող հույսը դնել միայն ՆԱՏՕ-ի ներկայիս կարգավորումների վրա։
Վերջին շաբաթներին Եվրոպայի այլ պաշտոնյաներ նույնպես ընդգծել են միջուկային զսպման ամրապնդման անհրաժեշտությունը։ Գերմանիայի և Ֆրանսիայի միջև Փարիզի միջուկային հովանոցի ընդլայնման և անկախ եվրոպական պաշտպանության մեխանիզմ ստեղծելու վերաբերյալ բանակցությունները այս զարգացումների մի մասն են կազմում։ Ֆրանսիան, որպես ԵՄ միակ միջուկային տերություն, կենտրոնական դեր է խաղում այս քննարկումներում։
Հարկ է նշել, որ Ռուսաստանը զգուշացրել է Արևելյան Եվրոպայում ՆԱՏՕ-ի ռազմական ենթակառուցվածքների ընդլայնման մասին և իր սահմանների մոտ զսպման կարողությունների ցանկացած ուժեղացում համարում է ուղղակի սպառնալիք։