Ավստրալիայում պատրաստվում են «սև արկղ» կառուցել՝ մարդկության հնարավոր կործանման դեպքի համար

Արևմտյան Թասմանիայում իրականացվում է Earth’s Black Box նախագիծը՝ մոտ տաս մետր երկարությամբ պողպատե մոնոլիտ, որը պետք է արձանագրի մարդկության պատմությունն ու նրա հնարավոր անհետացման պատճառները։

Կառուցվածքը պատրաստվում է 7,5 սմ հաստությամբ պողպատից և տեղադրվում է գրանիտե հիմքի վրա՝ հեռավոր և երկրաբանական առումով կայուն տարածքում։ Նախաձեռնողները Թասմանիայի համալսարանն են, Clemenger BBDO գործակալությունը և The Glue Society արվեստախումբը։

Սարքը գործելու է արևային էներգիայով և նախատեսված է դարեր շարունակ ինքնավար ծառայության համար, հաղորդում է Bild-ը։ Ներսում տեղադրվելու են տվյալների պահպանման համակարգեր, որոնք անընդհատ կարձանագրեն CO₂-ի կոնցենտրացիան, օդի և օվկիանոսի ջերմաստիճանը, ծովերի թթվայնացման մակարդակը, էներգիայի սպառումը, ինչպես նաև քաղաքական որոշումները, նորությունները և սոցիալական ցանցերի հրապարակումները։

Նախագծի հեղինակները հայտարարում են, որ գլոբալ կոլապսի դեպքում «սև արկղը» թույլ կտա ապագա սերունդներին հասկանալ, թե ինչ է տեղի ունեցել։ Համակարգի լիարժեք գործարկումը նախատեսված է մինչև 2026 թվականը։