Վենդի Շերման. ԱՄՆ-ն չի կարող լիովին վերաբացել Հորմուզի նեղուցը
Ամերիկացի բարձրաստիճան դիվանագետ և ԱՄՆ նախկին փոխպետքարտուղար Վենդի Շերմանն անդրադարձել է Հորմուզի նեղուցում Իրանի ռազմավարական դիրքին և նշել, որ նույնիսկ եթե այս ծովային ճանապարհը վերաբացվի, Վաշինգտոնը չի կարողանա կանխել Իրանի ազդեցությունը և վերականգնել վերահսկողությունը դրա նկատմամբ։
Շերմանն ընդգծել է, որ Իրանը ունի այն համոզմունքը, որ կարող է ցանկացած պահի կրկին փակել Հորմուզի նեղուցը կամ կիրառել սահմանափակումներ, ինչպիսիք են տարանցիկ վճարների գանձումը և նավերի երթևեկության համար Հեղափոխական պահապանների հաստատումը պահանջելը։ Նա հավելել է, որ Հորմուզի նեղուցի աշխարհագրական դիրքը և իրանական ռազմական ուժի տեղակայումը այս ջրային ուղու ափամերձ շրջաններում, կարևոր առավելություն են ստեղծել Թեհրանի համար։
Ամերիկյան ԶԼՄ-ների հաղորդմամբ՝ Շերմանը նշել է, որ անօդաչու թռչող սարքերի տեխնոլոգիան փոխել է ծովային պատերազմի հավասարումները, և Իրանը դեռևս պահպանում է իր գործառնական կարողությունների զգալի մասը։
Անդրադառնալով Դոնալդ Թրամփի՝ Իրանի դեմ վարած քաղաքականությանը՝ Շերմանն ասել է, որ չնայած Թեհրանի ռազմական հզորության մի մասը թուլացել է, այնպիսի կարողություններ, ինչպիսիք են մոտորանավակները, անօդաչու թռչող սարքերի տեխնոլոգիան և միջուկային գիտելիքները, մնացել են անփոփոխ։ Նրա խոսքով՝ այդ կարողությունների լիակատար ոչնչացումը հնարավոր չէ, և Իրանը կաշխատի վերականգնել իր հրթիռային, ռազմածովային և միջուկային կարողությունները։
Ամերիկացի դիվանագետը նաև զգուշացրել է, որ Հորմուզի նեղուցի նկատմամբ Իրանի վերահսկողությունը չի սահմանափակվում միայն ռազմական հզորությամբ, այլ կապված է նաև նրա աշխարհաքաղաքական դիրքի և աշխարհի ամենակարևոր էներգետիկ միջանցքներից մեկի նկատմամբ բնական գերիշխանության հետ. մի հարց, որը մնում է Միացյալ Նահանգների և տարածաշրջանում նրա դաշնակիցների համար հիմնական մարտահրավերներից մեկը։