ԱՄՆ-ի դաշնակիցները չեն հավատում Հորմուզի նեղուցի ականազերծման վերաբերյալ Թրամփի պնդումներին
Bloomberg-ը չորեքշաբթի օրը հայտնել է, որ ԱՄՆ-ի դաշնակիցների կարծիքով Հորմուզի նեղուցը դեռևս ամբողջությամբ չի մաքրվել ծովային ականներից։
ISNA-ի հաղորդմամբ՝ հրապարակման մեջ նշվում է, որ ականազերծման գործողությունը բարդացել է քանի որ ծովային հոսանքների հետևանքով որոշ ականներ կարող են տեղաշարժված լինել։
Միևնույն ժամանակ, ԱՄՆ-ի գործընկերները կարծում են, որ այդ գործողությունն իրականացնելու համար անհրաժեշտ են միջազգային ջանքեր և առաջադեմ տեխնոլոգիաներ։
Հաղորդման մեջ նաև նշվում է, որ Վաշինգտոնի դաշնակիցները ցանկանում են, որպեսզի Իրանը թույլ տա Օմանին իր ջրերում ականազերծման աշխատանքներ իրականացնել։
Ավելի վաղ՝ երեքշաբթի օրը, ԱՄՆ նախագահ Դոնալդ Թրամփը կրկին պնդել էր, թե ԱՄՆ-ի ռազմածովային ուժերն իրեն տեղեկացրել են, որ Հորմուզի նեղուցի միջազգային ջրերից բոլոր ականները «հավաքվել կամ ոչնչացվել են»։
Թրամփը այս հայտարարությունը հրապարակել էր Truth Social սոցիալական ցանցում այն ժամանակ, երբ Պակիստանի բանակի հրամանատար Ասիմ Մունիրը մեկնել էր Թեհրան։ Տարբեր լրատվամիջոցներ հաղորդել էին, որ Մունիրն այդ այցի ընթացքում ԱՄՆ-ի կողմից Իրանի հետ քաղաքական բանակցությունների մեկնարկի վերաբերյալ առաջարկներ և ուղերձներ էր փոխանցում։