Սիրիայում պատերազմը կավարտվի, երբ Հալեպում լռեն թնդանոթները. La Criox, Ֆրանսիա
Հալեպում Մարոնի եկեղեցու (արաբ քրիստոնյաներ) եպիսկոպոս հայր Թոբիջը արևմտյան ԶԼՄ-ներին մեղադրում է քաղաքի համար մղվող պատերազմը երկակի ստանդարտներով ներկայացնելու համար:
«Երբ 2013թ. մեզ ինը ամիս շրջափակել էին ահաբեկիչները՝ քաղաքի արևելյան հատվածը գրաված ապստամբները, մենք չէինք տեսնում մեր սարսափելի վիճակի մասին ոչ մի լուր: Մենք զրկված էինք լույսից և էլեկտրականությունից, ճանապարհը փակել էին ապստամբները: Մի՞թե մեր մասին գրում էին արևմտյան լրատվամիջոցները. ո՛չ»:
2014թ. քաղաքի արևմտյան շրջանները հետ գրավվեցին ռեժիմի զորքերի կողմից: Արդյունքում սիրիական զորքը սկսեց վերահսկել ճանապարհը, որով իրականացվում է մատակարարումը: «Սակայն ամեն օր ոչ պակաս քան 10 մարդ զոհվում է ահաբեկիչների կրակոցներից: Մենք մինչև հիմա թաքնվում ենք նկուղներում, երբ արկեր են թռչում»,- ասել է եպիսկոպոսը:
Նա նաև խոստովանում է ռուս-սիրիական օդուժի հարվածների տակ գտնվող արևելյան թաղամասերում ապրող բնակիչների ծանր վիճակը: «Անմեղ մարդիկ են զոհվում. նրանք դարձել են զինված խմբավորումների պատանդը, որոնք թույլ չեն տալիս հատել հակամարտող կողմերի միջև ընկած սահմանագիծը»,- ասել է եպիսկոպոսը:
Մինչ պատերազմը Հալեպում 4 մլն բնակչություն կար, այժմ արևմտյան հատվածում ապրում է 1,5 մլն մարդ, որոնց գրեթե կեսը արևելյան շրջաններից եկած փախստականներ են: Այնտեղ մնացել է 250-300 հազար մարդ: «Արևմուտքում մուսուլման փախստականներին օգնում են բարեգործական կազմակերպությունները և եկեղեցիները: «Մենք տարբերություն չենք դնում քրիստոնյաների և մուսուլմանների միջև: Դա համակեցություն է, և փաստը, որ մենք՝ քրիստոնյաներս, օգնում ենք նրանց, կարող է փոխել նրանց աշխարհայացքը»,- ասում է նա:
Զենքերի շառաչը չի լռում, սակայն եպիսկոպոսը կարծում է. «Ամեն ինչ պարզ է. դադարեցրեք զենք վաճառել ահաբեկիչներին: Թող Թուրքիան փակի նրանց համար սահմանը: Պատերազմը Սիրիայում կավարտվի, երբ Հալեպում լռեն թնդանոթները»:
1in.am
