Երկրի վրա առաջին միջուկային պատերազմը կարող է սկսվել ջրի պատճառով. գիտնականներ
Մեր մոլորակի վրա առաջին միջուկային հակամարտությունը կարող է բռնկվել ոչ թե Ռուսաստանի ու ԱՄՆ-ի, այլ Հնդկաստանի և Պակիստանի միջև՝ Հինդուստան թերակղզում խմելու ջրի հասանելիության շուրջ աճող խնդիրների պատճառով։ Այս մասին հայտնում են ՄԱԿ-ի համալսարանի գիտնականները։
«Ինդոս գետի ավազանը հանդիսանում է ջրային «դանդաղ գործողության ռումբ», որը կարող է ամեն պահի պայթել՝ մեծացնելով ջրային ռեսուրսների դեֆիցիտը տարածաշրջանում և առաջացնելով կլիմայում անդառնալի փոփոխություններ»,-հայտնում են գիտնականները։
1960 թվականին կնքված համաձայնագրի շրջանակում Հնդկաստանը ստացել է իրավունք՝ օգտագործելու գետի երեք արևելյան վտակները, իսկ Պակիստանը՝ դրա երկու արևմտյան վտակների ջրերը։
2016-ի սեպտեմբերին Հնդկաստանի կառավարությունն առաջին անգամ մտադրություն էր հայտնել վերանայելու այդ համաձայնագիրը կամ դուրս գալու դրանից, ինչը պաշտոնապես Իսլամաբադն անվանել է Դելիի կողմից թշնամական գործողություն և հայտարարել, որ հնդկական կառավարության նման քայլը կարող է գնահատվել որպես «պատերազմի հայտարարում»։
1in.am
