ԵՄ. Ներկա պայմաններում անդամակցության հարցով չենք բանակցելու Թուրքիայի հետ
ԵՄ-ն մի հաղորդագրությամբ հայտարարեց, որ Թուրքիայում հեղաշրջմանը հաջորդած ժամանակաշրջանում ծավալված հալածանքների կապակցությամբ առկա մտահոգությունների պատճառով ներկա պայմաններում պատրաստ չէ այդ միությանն անդամակցելու հարցով խորհրդակցել Անկարայի հետ:
Համաձայն «Ֆրանս Պրես»-ի հաղորդման, ԵՄ երեքշաբթի օրվա հաղորդագրության մեջ նշված է, որ ներկա պայմաններում Թուրքիայի հետ բանակցության որևէ նոր գլուխ չի բացվելու:
ԵՄ-ն հունիս ամսին սկսեց Թուրքիայի հետ բանակցությունների 16-րդ շրջանը: Հատկանշական է սակայն, որ բանակցություններից միայն մի շրջանն է հաջող ավարտ ունեցել:
Վերջնական համաձայնության հանգելու համար ԵՄ-ն ու Թուրքիան պիտի համաձայնության գան 35 կետերի շուրջ:
ԵՄ անդամ երկրներից Ավստրիան հրաժարվել է ստորագրել այդ հաղորդագրությունը:
Ավստրիայի ներկայացուցիչներն ակնկալում էին, որ այդ հաղորդագրությունն ընդմիշտ փակված պիտի հայտարարի Թուրքիայի հետ ԵՄ-ի բանակցության թեման:
