Թուրքիայի Սահմանադրության փոփոխությունները վավերացվեցին
Թուրքիայի խորհրդարանը շաբաթ օրը 339 կողմ ձայներով վավերացրեց այդ երկրի Սահմանադրության 18 կետերի փոփոխությունը:
Համաձայն «Անատոլու» լրատվական գործակալության հաղորդման, այս կապակցությամբ քվեարկության երկրորդ փուլը չորեքշաբթի օրը տեղի ունեցավ Թուրքիայի խորհրդարանում: Թուրքիայի Սահմանադրության գլխավոր փոփոխությունը վերաբերում է երկրի քաղաքական համակարգը խորհրդարանականից նախագահականի փոխելուն ու նախագահի լիազորությունների ընդլայնմանը:
Թուրքիայի վարչապետ Բինալի Յըլդըրըմն ասել է, որ հիմա հերթը ժողովրդինն է, որ իր տված քվեներով որոշում կայացնի:
Թուրքիայի սահմանադրական բարեփոխումների վավերացման համար պահանջվում է հանրաքվեի կողմ ձայների 51 տոկոսը:
Հիշեցնենք, որ Թուրքիայի քաղաքական համակարգը խորհրդարանականից նախագահականի փոխելու կառավարության ջանքերը քննադատությա են արժանացել ընդդիմության կողմից:
Խորհրդարանի Ժողովրդա-հանրապետական և Ազգերի ժողովրդավարություն կուսակցությունները հայտարարել են, որ այս փոփոխությունների արդյունքում Թուրքիայի նախագահ Ռեջեբ Թայիբ Էրդողանն իր լիազորությունների ընդլայնմամբ խստացնելու է ընդդիմության նկատմամբ իր քաղաքականությունը:
Թուրքիայի սահմանադրական բարեփոխումների վավերացման դեպքում, Էրդողանը կարող է մինչև 2029 թվականն իշխանությունը պահել իր ձեռքում:
