Նյու-Յորքի Ժամանակակից արվեստների թանգարանը բողոքել է Թրամփի որոշման դեմ
Ի նշան միգրացիայի մասին ԱՄՆ-ի նախագահի հրամանի դեմ բողոքի, Նյու-Յորքի Ժամանակակից արվեստների թանգարանը եվրոպացի հանրահայտ արվեստագետների գործերը փոխարինել է այդ հրամանի մեջ ներառված երկրների արվեստագետների ստեղծագործություններով:
«Նյու-Յորք թայմս» օրաթերթը գրել է, Նյու-Յորքի Ժամանակակից արվեստների թանգարանն իր հինգերորդ հարկի ցուցասրահները, որտեղ մշտապես ցուցադրվում են եվրոպացի արվեստագետների ժամանակակից ստեղծագործությունները, հատկացրել է Իրանի, Իրաքի և Սուդանի ժամանակակից արվեստագետների աշխատանքներին:
Նրանց կերտած կտավի, արձանի կամ լուսանկարի կողքին գրված է՝ «Այս ստեղծագործությունը պատկանում է այն երկրի արվեստագետին, ում քաղաքացիներն ԱՄՆ մուտք գործելու իրավունք չունեն»:
Վերջին շաբաթվա ընթացքում ԱՄՆ-ի մյուս թանգարանները նույնպես բողոքել են Թրամփի որոշման դեմ:
Լոս Անջելեսի թանգարաններից մեկի տնօրենը չկշռադատված, ոչ-անհրաժեշտ և ավերիչ է բնութագրել Թրամփի հրամանը:
