ԵԱՏՄ-ն և ԵՄ-ն քննարկել են դեղամիջոցների որակի ստանդարտացման հարցը
Եվրասիական տնտեսական միությունում դեղերի որակի ապահովման միասնական պահանջների ներդրումն անհրաժեշտություն է որակյալ դեղերի արտադրության առումով, ինչի արդյունքում միության անդամ երկրների քաղաքացիները ապահովված կլինեն անվտանգ և որակյալ դեղերով:
Ինչպես հաղորդում է «Արմենպրես»-ը, վկայակոչելով Եվրասիական տնտեսական հանձնաժողովի կայքը, այս մասին Ստրասբուրգում դեղամիջոցների որակի և առողջապահության հարցերով Եվրոպական դիրեկտորատի տնօրեն Սյուզան Քայտելի հետ հանդիպմանն ասել է Եվրասիական տնտեսական հանձնաժողովի տեխնիկական կարգավորման հարցերով նախարար Վալերի Կորեշկովը:
«Մենք դեղերի որակի միասնական պահանջ սահմանելու հարցում առաջին հերթին հենվում ենք եվրոպական լավագույն փորձի վրա: Այստեղ ցանկացած դեղամիջոցի համար հստակեցնում են օպտիմալ պահանջները, որոնք երաշխավորում են դրանց բարձր որակը»,- ասել է Կորեշկովը:
Կողմերը համակարծիք են այն հարցում, որ Եվրասիական տնտեսական միության տարածքում դեղերի որակի միասնական պահանջների սահմանումը նոր իմպուլս կհաղորդի այդ ոլորտում միջազգային առևտրային հարաբերություններին:
armenpress.am
