ԵԱՏՄ անդամ երկրների վարչապետները կհանդիպեն մարտի 7-ին Բիշքեկում
Եվրասիական միջկառավարական խորհրդի հերթական նիստը կանցկացվի Բիշքեկում՝ մարտի 7-ին։ Ինչպես հայտնում է «ՌԻԱ Նովոստի» գործակալությունը, այդ մասին տեղեկացրել է Ղրղզստանի կառավարությունը։
«Եվրասիական տնտեսական միությունում Ղրղզստանի Հանրապետության նախագահության շրջանակում ԵԱՏՄ անդամ երկրների կառավարությունների ղեկավարները Բիշքեկ քաղաքում մարտի 7-ին կանցկացնեն Եվրասիական միջկառավարական խորհրդի հերթական նիստը»,- տեղեկացրել են Ղրղզստանի իշխանությունները։
Միջոցառմանը կմասնակցեն ՀՀ վարչապետ Կարեն Կարապետյանը, ՌԴ վարչապետ Դմիտրի Մեդվեդևը, Ղրղզստանի վարչապետ Սոորոնբայ Ժեենբեկովը, Ղազախստանի վարչապետ Բաքըտժան Սագինտաևը, Բելառուսի վարչապետ Անդրեյ Կոբյակովը։
Նիստին կքննարկվեն ինտեգրացիոն միավորման շրջանակում համագործակցությանն առնչվող հարցեր։
Ղրղզստանի փոխվարչապետ Օլեգ Պանկրատովը գործակալությանը հայտնել է, որ նիստին չեն ընդունվի բեկումնային որոշումներ։
tert.am
