Բելառուսի զինվորականները սպառնացել են Լիտվային
Մինսկից Լիտվային նախազգուշացրել են, որ զինվորականները պատրաստ են ուժ կիրառել օդային սահմանի կրկնակի խախտումների դեպքում։
Այս մասին հայտնել է Բելառուսի ՌՕՈՒ ու ՀՕՊ զորքերի հրամանատար Օլեգ Դվիգալեւը, փոխանցում է «Ինտերֆաքսը»։
Զինծառայողը նշել է, որ ապրիլի 19-ին Լիտվայի քաղաքացիական օդանավը մտել է բելառուսական օդային տարածք «կառուցվող ատոմակայանի մոտ»։ «Մենք Բելառուսի օրենսդրության ու միջազգային նորմերի համաձայն չենք ձեռնարկել ուժային միջոցառումներ տվյալ օդանավի նկատմամբ»,- ասել է նա։
Դվիգալեւը շեշտել է Լիտվայի հետ բարիդրացիական հարաբերությունները, բայցեւայնպես հավելել է, որ Վիլնուսում պետք է հասկանան համաձայնագրերի իրականացման կարեւորությունը։ «Ուզում ենք հավատալ, որ դա օդաչուի պատահական սխալն է եղել, այլ ոչ թե հատուկ ծրագրված ակցիա, ու հույս ունեմ, որ Լիտվան կհաստատի դա»,- հավելել է հրամանատարը։
Բելառուսի զինվորականները պնդում են, որ չեն եղել որեւէ հանգամանքներ, որոնք կարող էին արդարացնել խախտումը։
ՊՆ-ի տվյալներով Վիլնուսը տեղեկացված է եղել թեթեւաշարժիչ օդանավի մասին, որը սահմանի կողմն էր ուղեւորվում։ Սակայն այն շարունակել է թռիչքը, ութ կմ մտել բելառուսական օդային տարածք, միայն դրանից հետո շրջվել հետ։
Ապրիլի 22-ին տեղի ունեցած միջադեպի կապակցությամբ Բելառուսի ԱԳՆ են կանչել Լիտվայի դեսպան Անդրյուս Պուլոկասին։ Նրան բողոքի նոտա են հանձնել։ Դրանում ասվում է, որ բելառուսական կողմը ակնկալում է բացատրություններ։
News.am
