Կրեմլը հակազդել է Սպիտակ տան հակառուսական նոր շրջափակումներին
Կրեմլի խոսնակը ԱՄՆ-ի հակառուսական նոր շրջափակումները ոչ կառուցողական ու վնասակար է համարել կողմերի համար:
Ֆրանսպրեսս գործակալության փոխանցմամբ երկուշաբթի օրը լրագրողների հետ հանդիպման ժամանակ Կրեմլի խոսնակ Դմիտրի Պեսկովն ասել է.«ԱՄՆ-ի հակառուսական նոր շրջափակումները, որոնք պետք է երեքշաբթի օրը քվեարկության դրվի կոնգրեսում վնասելու են երկու երկրների շահերին և վնասակար են երկկողմ հարաբերությունների պահպանման ու զարգացման համար»:
«Մոսկվան Վաշինգտոնի այդ քայլը անընդունելի ու բացասական է համարում»․ հավելել է Պեսկովը:
Շաբաթ՝ հուլիսի 22-ին ԱՄՆ սենատի և ներկայացուցիչների պալատի հանրապետական ու դեմոկրատական պատգամավորները համաձայնության են եկել Իրանի, ՌԴ-ի և Հյուսիսային Կորեայի դեմ նոր շրջափակումներ սահմանելու շուրջ:
ԱՄՆ սենատը նոր շրջափակումների օրենքը վավերացրել է հունիսի 15-ին, սակայն հանրապետականների կողմից շրջափակումների փաթեթին Հյուսիսային Կորեայի ներառման մասին ներկայացված առաջարկի բերումով ներկայացուցիչների պալատում դրա մասին քվեարկությունը հետաձգվել է»:
