Պատժամիջոցները չեն կանգնեցնի մեզ. Հյուսիսային Կորեա
Հյուսիսային Կորեան նախազգուշացրել է, որ ՄԱԿ-ի նոր պատժամիջոցները թույլ կտան իրեն ավելի արագ ավարտել միջուկային ծրագիրը: Այս մասին հայտնում է BBC News-ը:
Աղբյուրի հաղորդմամբ՝ Հյուսիսային Կորեայի արտգործնախարարությունը շատ կտրուկ արտահայտություններով «ամենադաժան, ոչ էթիկական և անմարդկային թշնամական ակտ» է անվանել իր դեմ մտցված նոր սահմանափակումները:
«ԱՄՆ-ի և նրա վասալների ջանքերի ակտիվացումը, որն ուղղված է պատժամիջոցներ մտցնելուն և Հյուսիսային Կորեայի վրա գործադրվող ճնշումն ուժեղացնելուն, միայն կարագացնի պետական միջուկային ծրագիրն ավարտին հասցնելուն ուղղված աշխատանքները», - ասվում է Հյուսիսային Կորեայի արտգործնախարարության հայտարարությունում, որը հրապարակել են երկրի պետական լրատվամիջոցները:
Հայտարարությունում նաև ասվում է, որ ՄԱԿ-ի Անվտանգության խորհրդի ընդունած նոր պատժամիջոցների նպատակը երկրի բնակչության, դրա պետական համակարգի և կառավարության «ֆիզիկական բնաջնջումն է»:
Հիշեցնենք, որ Եվրամիության խորհուրդը երեք իրավաբանական և մեկ ֆիզիկական անձով ընդլայնել է Հյուսիսային Կորեայի դեմ սահմանված պատժամիջոցների ցուցակը:
ԵՄ խորհրդում հիշեցրել են, որ ՄԱԿ-ի Անվտանգության խորհուրդը ԿԺԴՀ-ի հարցում պատժամիջոցների մասին բանաձևն ընդունել է սեպտեմբերի 11-ին, որի համապատասխան ընդլայնվել են պատժամիջոցները:
tert.am
