Շվեդ գիտնականները նոր տեսակի ձյան փաթիլ են հայտնաբերել
Շվեդիայի հյուսիսում գտնվող Լուլեո քաղաքի Տեխնոլոգիական համալսարանի գիտնականները նոր տեսակի ձյան փաթիլ են հայտնաբերել, հաղորդում է «ՏԱՍՍ»-ը` վկայակոչելով Sveriges Radio-ն:
Այս բացահայտումը արել են բուհի նորաստեղծ բաժնի՝ «Ձյան ակադեմիայի» հետազոտողները: Նոր բյուրեղը ուսումնասիրել հնարավոր եղավ ռենտգեն մեքենայի օգնությամբ:
«Հիանալի է, որ մենք նոր գործիք ունենք՝ ռենտգեն մեքենա, որը թույլ է տալիս ուսումնասիրել ձյան առանձին բյուրեղները: Եվ նրա օգնությամբ մենք ձյան փաթիլ բացահայտեցինք, որի նկարագրությունը չգտանք արդեն գոյություն ունեցող գրականության մեջ: Սա ձյան փաթիլի նոր տեսակ է», - ասել է փորձարարական մեխանիկայի ոլորտի հետազոտող Յուհան Կասսելգրենը:
Նրա խոսքով՝ առաջին հայացքից ձյան փաթիլը աստղի է նման: Սակայն, ի տարբերություն արդեն հայտնի բյուրեղների, շվեդ գիտնականների բացահայտած փաթիլը փոքրիկ կնճիթիկ ունի՝ եւս աստղի տեսքով: Գիտնականների կողմից հայտնաբերված փաթիլը երկարավուն ձեւ ունի: «Նա նաեւ ունի խորություն եւ թունել ներսում», - բացատրել է Կասսելգրենը:
Գիտնականն ասել է, որ փաթիլը գտնվել է թարմ ձյան մեջ: Երբ ձյունը հնանում եւ խտանում է, ձյան փաթիլները վերածվում են սառցե բյուրեղների: Շվեդ փորձագետները մտադիր են ուսումնասիրել ձյան տարբեր տեսակների հատկությունները. ի՞նչ է նրանց հետ տեղի ունենում, օրինակ, երբ սեղմվում են մեքենաների անիվների տակ, կամ էլ տրակտորով հավաքելիս:
News.am
