Բարի երեկո հարգարժան բարեկամներ։ Ներկայացնում ենք գեղարվեստական հաղորդաշարի հերթական թողարկումը,որի ընթացքում կանդրադառնանք անցած շաբաթ մշակույթի և արվեստի ոլորտում տեղի ունեցած կարևորագույն իրադարձություններին։Հաղորդման շրջանակում լինելու են ռեպորտաժներ,որոնք ներկայացնելու է մեր գործընկերը։ Ընկերակցեք մեզ:

Էրամի այգին՝ Շիրազի այգիների գոհարը, Իրանի պատմական  եզակի այգիների մի նմուշ է՝ որը կառուցված է 110 հազար  քառակուսի մետր մակերեսով ուղղանկյուն տարածքի վրա, և նրա  նոճիները համաշխարհային համբավ ունեն։

Իրանի Շիրազ քաղաքը հայտնի է ոչ միայն համաշխարհային գրողներով և բանաստեղծներով, ինչպիսիք են Սաադին և Հաֆեզը, այլև  հեռավոր անցյալից ի վեր աշխարհում նրա հռչակն ու համբավը  կապված է եղել կանաչապատ այգիների,  ծառուծաղկի ու բլբուլի հետ։  Շիրազի տեսարժան և հայտնի այգիներից մեկը Էրամի այգին է:

Էրամի այգու իրական պատմության և կառուցման վերաբերյալ շատ առեղծվածներ կան, և այգու կառուցման վաղ ժամկետի վերաբերյալ միակ հասանելի փաստաթուղթը դրա հիշատակումն է բազմաթիվ  ուղեգրություններում։

Շիրազի Էրամի այգում գոյություն ունեցող շենքը կառուցվել է մոտ 200 տարի առաջ։

Այս եռահարկ շենքը զարդարված է գունավոր սալիկներով և գեղեցիկ սվաղով։ Գեղեցիկ են նաև այգու դռներն ու պատուհանները։

Շիրազի Էրամի այգին այն 9 իրանական այգիներից մեկն է, որոնք 2011 թվականին գրանցվել են ՅՈՒՆԵՍԿՕ-ի համաշխարհային ժառանգության ցանկում; ՅՈՒՆԵՍԿՕ-ում գրանցված իրանական այգիների հավաքածուն ներառում է Շիրազում գտնվող  Էրամի այգին ,  Ֆարսի Մարվդաշտում գտնվող Փասարգադի այգին,  Սպահանի  Չեհլստունի այգին , Քաշանի  Ֆինի այգին, Բեհշահրի Աբբաս Աբադի այգին, Քերմանի Շահզադեհի այգին, Բիրջանդի  Աքբարիեի այգին, Յազդի Դոլաթ Աբադի և  Փահլեվանփուր այգիները։

Իրանի Ֆարս նահանգի մշակութային ժառանգության, զբոսաշրջության և ձեռարվեստի գլխավոր տնօրեն Մոհամմադ Սաբեթ Էղլիդին ասել է, որ այս տարվա Նոռուզյան օրերին մեկ միլիոն 311 հազար 628 մարդ  այցելել է Ֆարս նահանգի  զբոսաշրջային վայրեր:

Իրանի ամենահեղինակավոր կինոփառատոններից է «Թեհրանի անիմացիոն բիենալեն», որը տասներեք անգամ անցկացվել է Մանուկների և պատանիների մտավոր զարգացման կենտրոնում. Փառատոն, որը կարևոր իրադարձություն է ոչ միայն Իրանում այս ոլորտի ակտիվիստների համար, այլև կարևոր և հեղինակավոր է նաև Իրանի սահմաններից դուրս՝ սկսած անիմացիայի բնագավառում զարգացած երկրներից մինչև այն երկրները, որոնք այս արվեստի ու արդյունաբերության ոլորտում դեռևս սկսնակ են համարվում։

Փառատոնի ուժեղ կողմերից կարելի է նշել նրա ազդեցությունը Իրանի անիմացիոն ոլորտի վրա՝ գիտական ​​և կրթական միջավայրից մինչև արտադրություն և հեռարձակում:  Երիտասարդ կինոգործիչների հետ միասին, ովքեր հույս ունեն, որ իրենց աշխատանքները կցուցադրվեն փառատոնում և կներկայացվեն Իրանի և աշխարհի անիմացիոն շուկայում, նույնիսկ Իրանի անիմացիայի բնագավառի ավագներն ու հայտնի մարդիկ նույնպես ողջունում են, որ իրենց աշխատանքները ներկայացվեն Թեհրանի անիմացիոն բիենալեում:  Անիմացիայի ակադեմիական հանրության ներկայացուցիչները ևս հաճախ ակտիվ ներկայություն ունեն այս միջոցառմանը, և փառատոնի հանդիպումներն ու աշխատաժողովներն անցկացվում են բարձր գիտական ​​մակարդակով։

Թեհրանի 13-րդ միջազգային անիմացիոն փառատոնը մեկնարկել է մարտի 3-ին՝ իրանական և միջազգային մրցութային անվանակարգերի ֆիլմերի ցուցադրությամբ, ինչպես նաև «թաղիքագործության» տեխնիկայով կերպարներ ստեղծելու աշխատաժողովի անցկացմամբ։

Փառատոնի քարտուղարության հաղորդագրության համաձայն՝ Թեհրանի 13-րդ միջազգային անիմացիոն փառատոնին մասնակցելու հայտ են ներկայացրել 1000-ից ավելի ֆիլմ 71 երկրից, իսկ 522 ֆիլմ Իրանից։ Ընտրության հանձնաժողովի ուսումնասիրությունից հետո, 195 ֆիլմ համարվել է մասնակցության պահանջներին համապատասխան,  որոնցից 33-ը եղել են իրանական, իսկ 162-ը՝ արտասահմանյան ֆիլմեր։

Թեհրանի 13-րդ միջազգային անիմացիոն փառատոնը, ինչպես  նախորդները, անցկացվեց չորս՝ մրցութային, արտամրցութային, հատուկ ցուցադրություն և հեռանկարային անվանակարգերում:

Այս շրջանում կազմակերպիչները  փորձում էին անուշադրության չմատնել բովանդակության թեման՝ տեխնիկայի և տեխնիկական հարցերի ֆոնին, քանի որ անիմացիան պետք է օգնի հանդիսատեսին լինել պատասխանատու, և սա ծանր պատասխանատվություն է, որ իր վրա է վերցրել Մանուկների ու Պատանիների մտավոր զարգացման կենտրոնը, և այս առումով ունի երկար ու բեղմնավոր անցյալ։

Միջազգային մրցույթի ժյուրիի թվում էին Ֆինլանդիայից Մայքի Կանտոլան, Չինաստանից՝ Յանտոնգ Ժուն, Ռուսաստանից՝ Ալեքսեյ Դամին, Պորտուգալիայից՝ Պեդրո Սարազինան և Իրանից՝ Հորմոզ Հաղիղին։

Չեչնիայում որոշել են սահմանափակում մտցնել երաժշտական ստեղծագործությունների տեմպի վերաբերյալ՝ րոպեում 80-ից մինչև 116 զարկ, հայտնում է Գրոզնի-ինֆորմը՝ հանրապետության մշակույթի նախարարությանը հղումով։ Այսպիսով, դանդաղ ու արագ երաժշտության կտորները «արգելվել» են։«Այսօր (Մշակույթի նախարարության ղեկավար) Մուսա Դադաևի գլխավորությամբ ընդլայնված կազմով հանդիպում է տեղի ունեցել Չեչնիայի Հանրապետության ստեղծագործական պետական և մունիցիպալ խմբերի ղեկավարների հետ, որի ընթացքում նա հրապարակել է վերջնական որոշումը՝ համաձայնեցված Չեչնիայի Հանրապետության ղեկավար Ռամզան Կադիրովի հետ: Ըստ որոշման՝ այսուհետ բոլոր երաժշտական, վոկալային և խորեոգրաֆիկ ստեղծագործությունները պետք է համապատասխանեն րոպեում 80-ից մինչև 116 զարկ ռիթմին»,- ասվում է հաղորդագրությունում։Գերատեսչությունում ավելացրել են, որ աշխատանքներ են տարվում չեչենական երաժշտական, վոկալային և խորեոգրաֆիկ ստեղծագործությունները չեչենական մտածելակերպին և երաժշտական ռիթմին համապատասխանեցնելու հարցով։Դանդաղ երաժշտական տեմպերը, օրինակ, ներառում են ադաջիոն (48–56 մետրոնոմի հարված), իսկ արագ տեմպերը՝ ալեգրո (120–140)։

«Երևանյան բեսթսելեր» հեղինակային նախագիծն այս շաբաթ ներկայացնում է փաստավավերագրական ստեղծագործությունների լավագույն տասնյակը՝ ըստ փետրվարի վաճառքների։

Թովմաս Առաքելյանի «Ճանապարհ»-ն առաջին տեղում է։ Այս գիրքը փոքրիկ ճամփորդությունների միջոցով պատմում է Հայ Առաքելական եկեղեցու մասին։ Գրքի հերոսը հենց դու ես, սիրելի՛ ընթերցող։

Դավիթ Մեջլումյանի «Գրողի տարած Մոտիվացիան» երկրորդ տեղում է։ Մեզ անընդհատ գցել են նույն թակարդը` խոստանալով մոտիվացնել գրքով, թրեյնինգով կամ ֆիլմով, իսկ իրականում ոչինչ էլ չեն տվել, որովհետև անհնար է մոտիվացնել որևէ մեկին գրքով կամ թրեյնինգով։ 

Ռենե Մոբորնի «Կապույտ օվկիանոսի ռազմավարությունը» երրորդ տեղում է։ Աշխարհի ավելի քան 40 լեզուներով թարգմանված երբևէ ամենաշատ վաճառված բիզնես-ձեռնարկներից է։ 

Ռոբին Շարմայի ընտանեկան իմաստնության դասեր վանականից, որը վաճառեց իր «Ֆերարին» գիրքը չորրորդ տեղում է։ Այս գիրքը Ռոբին Շարմայի հերթական բեսթսելերն է: 

Ռոբին Շարմայի «Մեծության ուղեցույց»-ը հինգերորդ տեղում է։ Ռոբին Շարման ընթերցողի դատին է ներկայացնում իր հերթական բեսթսելերը՝ «Մեծության ուղեցույցը»: 

Բոդո Շեֆերի «Հաղթողների 30 օրենքները» գիրքը վեցերորդ տեղում է։ Այն կսովորեցնի  լիարժեք վերահսկողություն հաստատել սեփական կյանքի նկատմամբ, փոխել վերաբերմունքը ինքներդ ձեր և շրջապատի հանդեպ, միշտ առաջ շարժվել ու զարգանալ, հասնել ֆինանսական անկախության, լինել «արծիվ», այլ ոչ թե «բադ»:

Հեկտոր Գարսիայի և Ֆրանսեսկ Միրալեսի «Իկիգայ․ երկար ու երջանիկ կյանքի ճապոնական գաղտնիքը» յոթերորդ տեղում է։ 

Ութերորդ տեղում է Գարեգին Նժդեհի «Չխրատվող ժողովուրդը»: Խորհրդածությունների և հոդվածների այս գրքում Նժդեհը դիմում է հայ երիտասարդությանը՝ մղելով ինքնաճանաչողության: 

Հայկ Խաչատրյանի «Հայոց թագուհիները» իններորդ տեղում է։ Այն դշխոյապատում-բամբիշապատում է: Գրքում ընդգրկված են Արամից մինչև Լևոն Զ.Լուսինյան՝ վաղնջական ժամանակներից մինչև 1375 թվականը հայոց թագուհու տիտղոսը կրող կանայք, որոնք ընթերցողին են մատուցվում հակիրճ կենսագրականներով և նրանց նվիրված գրական պատումներով: 

Տասներորդ տեղում է Ռոբերտ Կիյոսակիի «Հարուստ հայրիկ, աղքատ հայրիկ» գիրքը։ «Հարուստ հայրիկ, աղքատ հայրիկ»-ը անձնական ֆինանսների կառավարում ուսուցանող թիվ մեկ գիրքն է ամբողջ աշխարհում։ 

Վանաձորի Հովհաննես Աբելյանի անվան պետական դրամատիկական թատրոնում կրտսեր հանդիսատեսի համար սպասվում է նոր, գունեղ ու մասշտաբային ներկայացում։

Ինչպես «Արմենպրես»-ին հայտնեցին Վանաձորի Հովհաննես Աբելյանի անվան դրամատիկական թատրոնից, ապրիլի 11-ին և 12-ին կկայանա «Ռատատույ» ներկայացման պրեմիերան։

Վանաձորի դրամատիկական թատրոնն ապրիլի 6-ին Գյումրիում հյուրախաղով հանդես կգա Հովհաննես Թումանյանի «Անուշ» Ներկայացմամբ, իսկ ապրիլի 18-ին Գավառի դրամատիկական թատրոնում կմասնակցի ԿԳՄՍ նախարարության կողմից սկսած թատերական երկամսյակին՝ ներկայացնելով «Խոսիր ինձ հետ» ներկայացումը։

Ֆրանկոֆոնիայի օրերի շրջանակում Հայաստան է ժամանում «Լիոնի փոքրիկ երգիչներ» երգչախումբը։ 

Ապրիլի 10-ին, ժամը 19:00 Կոմիտասի անվան կամերային երաժշտության տանը կկայանա «Լիոնի փոքրիկ երգիչներ» երգչախմբի (ղեկավար՝ Սայմոն Հեբերլե) և «Հայաստանի փոքրիկ երգիչներ» երգչախմբի  (ղեկավար՝ Տիգրան Հեքեքյան) համատեղ համերգը։

Համերգը բաղկացած է երկու բաժնից՝ հոգևոր և աշխարհիկ։ Ծրագրում՝ ֆրանսիական, իտալական, անգլիական, սկանդինավյան, գերմանական, իսպանական և այլ ժողովուրդների խմբերգեր։

Բացի երևանյան համերգից, ապրիլի 12-ին, ժամը 19:00 Վանաձորի Էդուարդ Կզարթմյանի անվան երաժշտական դպրոցում կկայանա «Լիոնի փոքրիկ երգիչներ» երգչախմբի համերգը։

Համերգներն իրականացվում են ՀՀ ԿԳՄՍ նախարարության աջակցությամբ, Կամերային երաժշտության ազգային կենտրոնի և «Հայաստանի փոքրիկ երգիչներ»-ի համակազմակերպմամբ: