عبدالمنان نیازي د کابل په یو روغتون کښې مړ شو
د نیازي د کورنۍ غړیو د هغه مړینه تایید کړه.
د طالبانو د جلا شوې ډلې مشر ملاعبدالمنان نیازي، چې تېره اوونۍ په یوه برید کې ټپي شوی و، پرون په کابل کې مړ شو.
د نیازي د کورنۍ غړیو د هغه مړینه تایید کړه.
په عبدالمنان نیازي باندې د سې شنبې په شپه د هرات د ګذره او ادرسکن ولسوالیو ترمنځ د پیرخولې په سیمه کې برید وشو چې له کبله یې نیازی سخت زخمي شوی او درې ملګري یې وژل شوي وو.
هغه وړومبې د هرات په حوزوي روغتون کې داخل کړی شو خو وروسته د درملنې لپاره کابل ته یووړل شو.
عبدالمنان نیازي او د کوټې شورا یو شمېر نور غړي په ۱۳۹۴ لمریز کال د ملاعمر اخوند د مړینې له اعلانېدو وروسته د نوي مشرتابه پر سر د طالبانو له اصلي ډلې بېل شو.
دوي وروسته د هرات په شینډنډ ولسوالي کې د ملا محمدرسول اخوند په مشرۍ بېله ډله جوړه کړه.
دا هم ویل کېږي چې ملارسول اخوند د پاکستاني استخباراتو له لوري نیول شوی او اوس هلته بندي دی.
