امیر خان متقي د ماسکو فارمیټ په غونډه کښې د ګډون په موخه روسیې ته تلی دی
د طالبانو بهرنیو چارو وزارت سرپرست امیرخان متقي د مسکو فارمټ ناسته کې د ګډون په موخه پرون دوشنبه روسیې ته رسېدلی دی.
د طالبانو د بهرنیو چارو وزارت وياند حافظ ضياء احمد تکل وايي، چې متقي د روسیې په بلنه یاده ناسته کې د ګډون په موخه مسکو ته رسېدلی.
ښاغلي تکل په يو ويډيويي پيغام کې ويلي چې په دغې غونډه کې به په بېلابېلو سیاسي او اقتصادي مسایلو خبرې اترې وشي.
د بهرنیو چارو وزارت وياند همداراز ويلي چې متقي به مسکو کې دوه ورځې پاتې وي او له هغه وروسته به د تاتارستان مرکز کازان ښار ته لاړ شي.
بلخوا د طالبانو د سرپرست حکومت وياند ذبیح الله مجاهد د افغانستان لپاره سیمهییزې همکارۍ ډېرې مهمې بولي او وايي هغه اندېښنې چې ځينې ګاونډيان يې لري په دغو ټولو مسایلو بحث کېږي.
د سياسي چارو ځينې شنوونکي بیا په دغه غونډه کې د طالبانو د استازي حضور مهم بولي.
د پوهنتون استاد امینالله احساس وايي: هغه اختلافونه چې دواړه لوري یې لري د تفاهم له لارې حل کېدای شي.
د سیاسي چارو بل شنوونکی عبدالغفار کامیاب وايي: پکار ده چې په دغو غونډو کې وضعیت ته په پام سره د رسمیت پېژندلو پر موضوع بحث وشي.
روسیه، هند، ایران، قزاقستان، قرغیزستان، چین، پاکستان، تاجیکستان، ترکمنستان او ازبیکستان د مسکو فارمټ غړي هېوادونه دي.
