طالبانو د جاپان د رغنده رول هرکلی وکړ
زمونږ خبریال راپور راکړی د طالبانو د حکومت د کورنیو چارو وزیر سراج الدین حقاني په کابل کښې د جاپان له پخواني او نوي سفیر سره په کتنه کښې وویل ټوکیو د افغانستان په بیا رغاونه کښې رغنده رول لوبولای شي.
جاپان په هغو محدودو هیوادونو کښې راځي چې په افغانستان باندې د طالبانو ډلې له بیا واکمنیدا وروسته یې هم د دغه هیواد له خلکو سره مرستې نه دي بندې کړي.
د طالبانو د کورنیو چارو د وزارت ویاند عبدالمتین قانع نن په ایکس اینټرنیټ پاڼې کې ولیکل د کورنیو چارو وزیر سراج الدین حقاني په افغانستان کښې د جاپان له پخواني سفیر تاکاشي اوکادا او نوي سفیر تاکویوشي کورمایا سره په کتنو کښې ټینګار وکړ د دواړو هیوادونو تاریخي اړیکو ته په پام سره ټوکیو کولای شي د افغانستان په بیا رغاونه کښې رغنده رول ولوبوي.
سراج الدین حقاني دغه راز په تیرو دوو کلونو کښې د افغانستان له خلکو سره د جاپان د مرستو قدرونه وکړه.
