د طالبانو د کرنې وزارت لوړ رتبه پلاوی ازبکستان ته ولاړ
د افغانستان د کرنې، اوبولګولو او مالدارۍ وزارت مرستیال مولوي صدراعظم عثماني په مشرۍ يو پلاوی د ازبکستان هېواد ته سفر کړی.
د دې سفر موخه د کرنې او مالدارۍ په برخه کې د پانګوالو ترمنځ د اړیکو او همغږۍ پیاوړتیا او د کرنې او مالداۍ په برخه کې د دواړو هېوادونو ترمنځ د همکاریو پراخول ښودل شوي.
ټاکل شوې چې ياد پلاوی د دغه سفر په ترڅ کې د ازبکستان د اوبولګولو وزارت له چارواکو سره وګوري او د دوه اړخیزو همکاریو ځينې تړونونه لاسلیک کړي.
ويل کېږي چې دواړه لوري به د غنمو او پنبې د اصلاح شویو تخمونو، د بڼوالۍ پراختیا، د کارکوونکو وړتیا لوړولو، د افغانستان په وچو او شاړو ځمکو کې پانګونې او په یوشمېر نورو برخو کې خبرې اترې وکړي.
دا په داسي حال کې ده چې څه موده وړاندې د ازبکستان مرستیال ولسمشر او ورسره پلاوي افغانستان ته سفر کړی وو او په سوداګرۍ او يو شمېر نورو موضوعاتو يې خبرې وکړې.
