د سالنګ لویه لاره د هر ډول موټرو پرمخ پرانیستل شوه
Dec 29, 2023 03:03 Asia/Kabul
د افغانستان سرپرست حکومت د ټولګټو چارو وزارت خبر ورکړی چې د سالنګ لویه لاره یې د هر ډول موټرو پرمخ پرانیسته.
د دغه وزارت ویاند محمد اشرف حق شناس په یوه ویډیويي پیغام کې چې رسنیو ته لېږل شوی، ویلي دغه لار پرون پنجشنبه د ټولو موټرو پرمخ پرانیستل شوه.
هغه وویل: "د سالنګ لویه لار له دواړو لوریو د ۳۰۳، ۴۰۴ او ۵۸۰ ډوله مسافروړونکو موټرو پرمخ په نورمال ډول پرانیستل شوه. د لوړ توناژ لرونکي باروړونکي موټرونه د مهالوېش له مخې په نوبت سره پر لار تګ راتګ کولی شي."
د سالنګ لویه لار چې کابل له ۹ شمالي ولایتونو سره نښلوي، تېره اوونۍ د وړو موټرو پرمخ پرانیستل شوې وه.
دغه لار د څلورو میاشتو لپاره د بیارغونې له کبله تړل شوې وه چې تېره اوونۍ پرانیستل شوه.
ټیګونه
