طالبانو له هند سره د سیاسي اړیکو پر پراختیا ټینګار کړی
د طالبانو د بهرنیو چارو وزیر امیرخان متقي د هند د بهرنیو چارو وزارت له ځانګړي استازي انند پرکاش سره په لیدنه کې له نوې ډیلي سره د سیاسي اړیکو پر پراختیا ټينګار کړی دی.
د دغه وزارت مرستیال ویاند حافظ ضیا احمد تکل پر شبکې اېکس کې لیکلي چې متقي په دې لیدنه کې د سوداګرو په ګډون ناروغانو او محصلانو ته د ویزې په وکړه کې د اسانتیاوو برابرولو غوښتنه کړې ده.
متقي پر هندي پانګوالو هم غږ کړی چې په افغانستان کې پانګونه وکړي.
بل پلو د هند ځانګړي استازي هم له طالبانو سره په بېلابېلو برخو کې د اړیکو پراخولو غوښتنه کړې ده.
نوموړي زیاته کړې چې هېواد یې غواړي په افغانستان کې خپلې نیمګړې پروژې هم بشپړې کړي.
د یادونې ده چې هند او طالبانو له شاوخوا دریو کالو وروسته د دیپلوماتیکو اړیکو په برخه کې خبرې اترې پیل کړي دي، خو تر اوسه یې دطالبانو دولت په رسمیت پېژندلې نه ده.
