طالبانو د پاشدان بند ګټې اخیستنې ته وسپاره
طالبانو د هرات د پاشدان د اوبو بند، چې کار یې شاوخوا ۱۵ کاله وړاندې پیل شوی و، ګټې اخیستنې ته وسپاره.
د دې پروژې کار په ۱۳۹۰ کال کې پیل شوی و او ویل کېدل چې د طالبانو له واکمنۍ مخکې له ۶۰ سلنې زیات بشپړ شوی و.
د طالبانو د انرژۍ او اوبو وزارت سرپرست عبدالطیف منصور، د پاشدان د اوبو بند د پرانیستې په مراسمو کې وویل: د دې بند د جوړولو ټول لګښت د طالبانو د حکومت له بودجې څخه ورکړل شوی دی.
د پخواني حکومت په دوره کې د پاشدان د اوبو بند د جوړولو لګښت ۱۱۷ میلیون ډالره اټکل شوی و.
د هرات د پاشدان بند د هرات ښار څخه ۲۰ کیلومتره واټن په کرخ ولسوالۍ کې د هریرود پر سیند جوړ شوی دی.
دا بند د ۵۴ میلیون متر مکعب اوبو د ذخیره کولو ظرفیت، د ۱۳ زره هکتاره ځمکې خړوبولو او د دوه میګاواټه برېښنا د تولید وړتیا لري.
طالبان د واک ترلاسه کولو مخکې، د ناامنۍ په رامنځته کولو سره، د پاشدان بند د جوړولو په مخنیوي کې له موانعو څخه یادېدل.
په یوه برید کې چې دې ډلې د پاشدان بند پر امنیتي پوست باندې کړی و، درې امنیتي سرتېري وژل شوي وو.
