ولسمشر غني په هلمند کښې شوې ترهګره چاودنه وغندله

د افغانستان ولسمشر د دغه هیواد په هلمند ولایت کښې شوې ترهګره چاودنه د انسانیت خلاف جنایت وباله.

له کابله زمونږ خبریال رپورټ راکړی چې پرون سهار د افغانستان د سویل د هلمند ولایت سنګین ولسوالۍ په بازار کښې د شوې ترهګرې چاودنې له امله ۲۵ تنه وژل شوي او لس نور زخمي شول.

د افغانستان ولسمشر محمد اشرف غني د دغې حملې په غندلو سره دغه کار یو وحشیانه، غیرانساني او د اسلامي او انساني ارزښتونو خلاف عمل وباله.

هغه یوځل بیا له طالبانو وغوښتل چې جنګ او تاوتریخوالی پریږدي او د صلحې د خبرواترو لاره هواره کړي.

دا په داسې حال کښې دي چې د دغې حملې پړه لا چا نه ده منلې.