د افغانستان حکومت او د طالبانو تماس ډلو غونډه وکړه
زمونږخبریال وايي قطر کې د افغانستان د حکومت او طالب مرکچیانو د تماس ډلو پرون ماښام لومړنۍ غونډه وکړه او نن دوشنبه به هم دوام وکړي.
دواړه لوري د پرمختګ خبره کوي، خو لا معلومه نهده چې د مرکچي پلاویو اصلي خبرې په کومه ورځ پیلېږي.
خو په افغان حکومت کې یوه سرچینه چې د موضوع د حساسیت له امله نهغواړي نومیې واخیستل شي وايي چې نن د افغانستان د حکومت او طالبانو د مرکچي پلاویو ترمنځ خبرې نهپیلېږي او ښايي په ورځو وځنډېږي.
د طالبانو د قطر دفتر ویاند محمد نعیم تېر ماخوستن پر خپله ټویټرپاڼه ولیکل چې د تماس ډلو په لومړنۍ ناسته کې د راتلونکو لیدو کتو پر کاري اصولو او مهالوېش خبرې وشوې.
که څه هم نوموړي دا په ډاګه کړې نهده چې د دغې ناستې پایله څه وه، خو په دوحه کې د دغو خبرو یو څارونکی او ګډونوال فیض محمد ځلاند وایي، د تماس ډلو خبرې لا نه دي فاینل شوي.
هغه زیاته کړه : "د تماس ډلې د دواړو خواو لهخوا د تخنیکي ستونزو په حل او د غونډې د پيل او پای په اړه او په لویه کې د غونډې د مدیریت په اړه بحثونه لرل، نهایي بحث چې د اجنډا جوړول دي، لا نهدی بشپړ شوی، د دواړو خواوو نه د سکرتریتونو په جوړولو او د وختونو په ټاکلو بحث پیل شوی."
د افغانستان دولت د مرکچي پلاوي یوه غړي نادر نادري هم ویلي چې د تماس ډلو په لومړنۍ غونډه کې د خبرو پر مهالوېش او نورو اړوندو مسئلو بحثونه او پرمختګونه وشول، نوموړي هم په دې اړه خپل ټویټ کې ډېر جزئیات نهدي ورکړي.
