کابل کښې بله چاودنه وشوه

بیګا یوې بلې چاودنې د کابل ښار ولړزوه

د کابل د پولیسو ویاند فردوس فرامرز وویل چې تیر ماښام کابو شپږ بجې د کابل ښار په دیوان بیګي سیمه کښې په یو ګاډي کښې د مقناطیسي بم چاودنه وشوه.

د چاودنې ځینې شاهدان وايي چې په دغې پیښې کښې د کابل ښار د پنځمې امنیتي حوزې قومندان ځلمی زخمي شوی دی.

پرون سهار هم په کابل ښار کښې د دوو پرله پسې چاودنو له امله لږترلږه اووه کسان زخمي شوي وو.

د دغو وچاودنو پړه تراوسه چا نه ده منلې.