ننګرهار کښې د منګل باغ وژله تایید شوه
د ننګرهار والي ضیاء الحق امرخېل د لښکر اسلام ډلې د مشر منګل باغ د وژل کېدو خبر ورکوي.
د ننګرهار والي ضیاء الحق امرخېل د لښکر اسلام ډلې د مشر منګل باغ د وژل کېدو خبر ورکوي.
ښاغلي امرخېل تیر ماښام مهال پر خپل ټوېتر لیکلي چې منګل باغ د ننګرهار د اچین ولسوالۍ په باندر درې، څېړۍ کڅونه سیمه کې د خپلو دوو ملګرو سره د ځای پر ځای شوي ماین په چادنه کې وژل شوی دی.
د ننګرهار والي د منګل باغ د وژلې په تاییدولو سره زیاته کړه چې نوموړي په ياده سيمه کې په ګڼ شمېر ترهګريزو فعاليتونو کې لاس درلود.
پاکستاني چارواکو ویلي، د منګل باغ په مشرۍ د لښکر اسلام ډله په خیبر پښتونخوا کې د خونړیدو بریدونو مسئوله ده.
د یادونې وړ ده چې منګل باغ څه موده وړاندې د افغان ځواکونو په هوایي برید کې سخت ټپي شوی هم و.
د لشکر اسلام په نامه د منګل باغ ډلې تر اوسه د خپل مشر د وژل کېدو په هکله کوم څه نه دي ویلي.
