د ایران او سري لنکا خارجه وزیرانو سره وکتل
د ایران او سري لنکا خارجه وزیرانو په خپل ملاقات کښې د دوه اړخیزو اړیکو او د مهمو سیمه ایزو او نړیوالو مسائلو په هکله د نظر تبادله وکړه.
د ایران د اسلامي جمهوریت خارجه وزیر محمد جواد ظریف چې سري لنکا ته تللی، نن یې له خپل سري لنکن همرتبه تیلک ماراپانا سره په کتنه کښې د دوه اړخیزو ملګرتیاؤ د پراختیا او د دواړ هیوادونو د اړیکو د لازیاتو برخو د موندلو په هکله د نظر تبادله وکړه.
تیل او انرجي، پټرو کمیکل، رغاونه، بانکي تبادلې او کرهڼیزې چارې د ایران او سري لنکا د خارجه وزیرانو د خبرواترو نورې برخې وې.
د ویلو ده چې د ایران خارجه وزیر محمد جواد ظریف د دوه اړخیزو اړیکو د پراختیا لاروچارو په هکله د سري لنکا له چارواکو سره د خبرواترو لپاره پرون د دغه هیواد پلازمینې کولمبو ته تللی دی.
د ایران خارجه وزیر به د سري لنکا له چارواکو سره له کتنې وروسته د سویل ختیځې آسیا د هیوادونو د اتحادیې (آسیان) په غونډه کښې د ګډون لپاره سنګاپور ته لاړ شي.
