د ايران او روسيې ګډ سمندري مشقونه به ډېر زر جوړ شي
د ايران د اسلامي جمهوريت د فوځ د سمندري ځواک قوماندان وويل، د ايران او روسيې د سمندري ځواکونو ترمنځ له سمندري ډاکوانو سره د مقابلې، امداد او ژغورنې تاکتيکي مشقونه به ډېر زر جوړ شي.
د اېسنا خبري اژانس د رپوټ له مخې د ايران د اسلامي جمهوريت د فوځ د سمندري ځواک قوماندان امير البحر جنرل حسين خانزادي وويل، د ايران او روسيې ګډ مشقونه به په سمندر کښې په سټراټيجکو، تاکتيکي او عملياتي سطحو کښې ملګرتياوې اوچتې اندازې ته ورسوي.
اميرالبحر خانزادي د دې په بيانولو سره چې د کېسپيئن سمندر پينځه ساحلي هېوادونه په دغه سمندر کښې له سيمې وراخوا هيڅ ځواک ته د شتون اجازه نه ورکوي، واضحه کړه، کېسپيئن د صلحې او دوستۍ سمندر دے او چاپېره يې ټول هېوادونه همدغه تګ لاره پلې کوي.
د ايران اسلامي جمهوريت ، روسيه ، آذربائيجان جمهوريت، قزاقستان او ترکمنستان د کېسپيئن سمندر پينځه ساحلي هېوادونه دي.
