یوې پاکستانۍ قاضي د افغان کډوالو د حقوقو په ملاتړ تاکید کړی
د پاکستان د محکمې دغې ښځینه غړې وویل چې هیواد یې د ملګرو ملتونو د کنوانسیونونو له مخې د هغه هیواد د مهاجرینو د حقونو په ساتنه مکلف دی.
د فارس خبري آژانس د خبر له مخې د پاکستان د محکمې غړې عایشه ملک وویل چې د ملګرو ملتو د کنوانسیونونو له مخې پاکستان د مهاجرینو د حقوقو په ساتنه مکلف دی.
میرمن ملک دغه څرګندونې په داسې حال کې کړي، چې د سترې محکمې درې کسيزه کمېټه د افغان کډوالو د اخراج په اړه د دوسيې د اورېدو لپاره رابلل شوې وه.
د سترې محکمې دغه غړي وويل چې د مهاجرينو اخراج يوه پيچلې موضوع ده چې د اساسي قانون تفسير ته اړتيا لري او بايد د دې موضوع د لا زياتې څيړنې لپاره يوه ستره کمیټه جوړه شي.
سترې محکمې د مهاجرینو د ایستلو په قضیه کې د بهرنیو چارو وزارت په ګډون یو شمیر پاکستاني ادارو ته هم نوټس جاري کړی دی.
د پاکستان د موقت حکومت له خوا د ناقانونه کډوالو د ویستلو له اعلان وروسته، څه باندې څلور لکه افغان کډوال له پاکستان څخه خپل هېواد ته راستانه شوي دي.
په پاکستان کې د سیاستوالو او د بشري حقونو د فعالانو په ګډون یو شمېر خلکو له سترې محکمې غوښتي چې د افغانانو د توقیف، جبري اخراج او ځورونې مخه ونیسي.
