د پاکستان دفاع وزارت:  ۲۴ طالبانو ته مو مرګ ژوبله اړولې

د پاکستان دولتي راډیو د دغه هېواد د دفاع وزارت د سرچینو له قوله ویلي، چې له پاکستاني سرحدي ځواکونو سره په نښته کې ۸ طالبان وژل شوي او ۱۶ نور ټپیان شوي دي.

دې راډیو ادعا کړې چې د دواړو لورو ترمنځ د ډزو په تبادله کې چې د جمعې په ماښام پیل  او د شنبې تر سهاره یې دوام وکړ، دوه افغان طالب قوماندانان هم وژل شوي دي.

دا په داسې حال کې ده چې د طالبانو دفاع وزارت تر اوسه په دې اړه څه نه دي ویلي.

خو پرون په خوست ولايت او د ځاځي ميدان ولسوالۍ په مربوطاتو کې چې جګړه وشوه،  سرچينې په دې سيمه کې د څلورو تنو د ټپي کيدو خبر ورکړی وو.

دوی دا هم ویلي، چې د ډیورنډ کرښې هغې غاړې ته د پاکستاني پوځیانو په ډزو کې لږ تر لږه پنځه پاکستاني پوځیان او د پوځ یو افسر ژوبل شوي دي.

دواړه لوریو د طالبانو د واکمنۍ په تېرو درېیو کلونو کې په ځلونو نښتې کړې دي.