د افغانستان د بهرنیو چارو وزارت ته د پاکستان د سفیر احضار
د افغانستان په ختیځو ولایتونو د پاکستان له راکټی حملو وروسته د افغانستان د بهرنیو چارو وزارت په کابل کښې د پاکستان سفیر احضار کړ.
له کابله زمونږ د خبریال د رپوټ له مخې د افغانستان د بهرنیو چارو وزارت وویل، د دغې وزارتخانې مرستیال حکمت خلیل کرزی په کابل کښې د پاکستان له سفیر«ابرار حسین» سره په کتنه کښې د دغه هېواد په سېند صوبه کښې په وروستۍ ترهه ګره حمله او د لسګونو کسانو په وژل کېدو د افسوس په څرګندولو سره وویل د افغانستان خلق د ترهه ګرۍ د اصلی قربانیانو په توګه د پاکستان د خلقو درد په ښه توګه درک کوی ځکه چې افغان خلق هره ورځ د لسګونو ترهه ګرو او راکټی حملو کتونکی دی.
هغه زیاته کړه، افغان حکومت د پاکستان په خاوره کښې د ترهه ګرو ډلو په وړاندې د دغه هېواد د اقداماتو غوښتونکے دے. د افغانستان د بهرنیو چارو د وزیر مرستیال د پاکستان له خاورې څخه د ننګرهار او کنړ ولایتونو په پوله ایزو سیمو راکټی حملې وغندلې او په کابل کښې د پاکستان له سفیر څخه یې په دې اړه وضاحت وغوښتۀ.
حکمت خلیل کرزی همدارنګ په پاکستان کښې د یو نیم سل افغان کډوالو له نیولو او د تورخم او چمن د پولو له تړل کېدو څخه یې اندېښنه څرګنده کړه.
