سعودي ائتلاف د يوې يمني ډرون الوتکې د نسکورولو ادعا وکړه
سعودي ائتلاف د دغه هېواد په جنوب کښې د يمني ځواکونو د يوې ډرون الوتکې د ليدو او نسکورولو ادعا وکړه.
د روسيااليوم خبري سائيټ د رپوټ له مخې سعودي ټي وي چېنل پرون وويل چې د رياض د قوماندانۍ لاندې عربي ائتلاف يوه بم اېښودل شوې ډرون الوتکه چې له يمن څخه د سعودي د جنوب د جازان په لور د الوت په حال کښې وه وليدې او نسکوره کړې شوه.
سعودي ائتلاف بې له څه ثبوت او سنده الحوثي غورځنګ په عامه خلقو باندې په حملو تورن کړاو وې ويل د خپلو ښاريزو د سر ساتنې لپاره به عملي اقدامات ترسره کړي.
سعودي ادعا په داسې حال کښې ده چې د يمن د وسله والو ځواکونو وياند جنرل يحيی سريع تل تاکيد کړے دے چې د يمن دغه دفاعي حملې د يمن په خلاف د سعودي ائتلاف د ځواکونو د تيريو او محاصرې په ځواب کښې دي.
سعودی د اماراتو، امريکې، اسرائيلو او څو نورو عربي او لويديځو هېوادونو په ملاتړ او اقتدار ته د مستعفي او فراري ولسمشر عبد ربه منصور د رسولو په بهانه د ۲۰۱۵ ميلادي کال له مارچ راهسې د يمن د خلقو خلاف حملې شروع کړې دي چې اوس هم دوام لري او په دغو حملو کښې په زرګونو کسان مړۀ او ژوبل شوي او د هېواد روغتونونه ، ښوونځی ، بېخ بنائي تاسيستات او د خلقو کورونه تباه کړې شوي دي . او په ميلينونو يمنيان کډه په سر شوي او اوس هم يمنيان د زمکې ، هوا او سمندر له لوري په محاصره کښې له سختو خوراکي، درملي او د ضرورت وړ نورو څيزونو له سخت کمښت سره مخامخ دي.
سعودي رژيم او د هغه انډيوالان تر اوسه د يمن د خلقو د مقاومت په وجه په دغه هېواد کښې خپلو مقاصدو يعنې اقتدار ته د خپلو لاسپوسو په رسولو کښې نه دي کامياب شوي.
