د سعودي وليعهد په ماڼۍ د يمني ځواکونو هوائي حمله
رسانه اي سرچينو د سعودي د وليعهد محمد بن سلمان په ماڼۍ د يمني ځواکونو د هوائي حملې خبر ورکړ.
د العهدالجديد سائيټ د رپوټ له مخې د يمن فوځي او ولسي ځواکونو په دې وروستيو کښې د سعودي د تبوک صوبې په نيوم ښار کښې د دغه هېواد د وليعهد محمد بن سلمان په ماڼۍ حمله وکړه.
د دغه رپوټ له مخې د يمني ځواکونو دغه حمله د محمد بن سلمان د ماڼۍ چاپېره د پېټرياټ نومې نوي سېسټم له نصب کېدو وروسته اوشوه.
د سعودي وليعهد تېره هفته د نيوم ښار ته د سفر ترڅنګه په نيوم پروژه کښې د اوکساګان صنعتي ښار جوړول اعلان کړل او ادعا يې وکړه چې دغه ښار به د نړۍ په اوبو کښې تېرېدونکے ترټولو ستر صنعتي کمپلېکس وي او د سعودي په سيمه ايز تجارت او د دغه هېواد په اقتصادي وده کښې به مهم رول ولري.
د دغې حملې د زيانونو په اړه څه رپوټ نه دے خپور شوے خو د يمن د فوځي او ولسي ځواکونو دغه حمله ښودنه کوي چې بن سلمان په نيوم نوي او ماډرن ښار کښې په خپله ماڼۍ کښې هم په امن کښې نه دے.
