په جنوبي سوریه کې د صهیونیسټي رژیم عسکرو نفوذ دوام لري
پارس ټوډی- د اسرائیلو د ګزمې موټر د «الصمدانیه» کلي ته داخل شوی او هلته یې د پلټنې پوسته جوړه کړې ده.
د صهیونیسټي رژیم اشغالګرې پوځ په جنوبي سوریه کې د اشغالي سیاستونو په دوام، پرون د یوې اسرائیلي ګزمې موټر د قنیطرې په شمالي سیمه کې د «الصمدانیه» کلي ته ننوت او هلته یې د پلټنې پوسته جوړه کړه.
د صهیونیسټي رژیم پوځیانو تر دې وړاندې د قنیطرې ولایت منځنۍ سیمې باندې هم یرغل کړی او هلته یې هم پوسته جوړه کړې ده.
له دې یوه ورځ مخکې، اسرائیلي اشغالګرو پوځیانو د الصمدانیه الشرقیه کلي او خان ارنبه ښار تر منځ په قنیطره کې هم د پوستې په جوړولو سره پلټنې کولې.
صهیونیسټ اشغالګر لا هم د سوریې په خاوره بریدونه کوي چې دا د ۱۹۷۴ کال د جلا کېدو تړون، نړیوالو قوانینو او د ملګرو ملتونو پرېکړه لیکونوڅخه ښکاره سرغړونه ده.
سوریه دا بریدونه غندي او له نړیوالې ټولنې غواړي چې د دې بریدونو د مخنیوي لپاره قاطع دریځ ونیسي.
