د بيروت چاودنې پينځلس ميليارډ ډالره تاوان رامنځته کړ

د لبنان ولسمشر مېشل عون وويل، د بيروت د چاودنې د تاوانونو اندازه پينځلس ميليارډ ډالره لګول شوې ده.

د فرانس پرېس د رپوټ له مخې د اګست په څلورمه نېټه په بيروت بندر کښې د چاودېدونکو موادو په يو ګودام کښې له اور لګېدنې  وروسته په خواو شا ګودامونو کښې چې پکښې تقريبا دوه زره اوه سوه ټنه اېمونيم نائټريټ موجود وو هېبتناکه چاودنه رامنځته شوه چې د لبنان د روغتيا د وزارت د اعلان له مخې په دغه چاودنه کښې يو سل يو اويا تنه مړۀ او تقريباً شپږ زره نور ژول شول.

له بلې خوا د بيروت چاودنو د سر او مال تاوانونو نه علاوه د لبنان په سياسي ډګر هم اثرات کړي دي لکه د لبنان وزيراعظم حسان دياب د خپل حکومت د کابينې استعفا اعلان کړه.