امریکا په عراق کښې داعش ډله له سره منظموي
فرات نیوز خبري اژانس راپور ورکړ د عراق د نجبا غورځنګ د مشر مرستیال نصر الشمري په دې خبرې سره چې په هیواد کښې د داعش ډلې د بیا ژوندي کولو لپاره د امریکا لخوا هڅې روانې دي وویل د بغداد حکومت باید په دې زمینه کښې پریکنده دریځ غوره کړي .
هغه پرون وویل د عراق ټول امنیتي او پوځي ځواکونه باید د هیواد په بیلابیلو سیمو کښې د پاکونې په عملیاتو کښې ګډون وکړي چې په دې ډول د داعش ډلې د بیا راژوندي کولو لپاره د هڅو مخه ونیول شي .
په عین حال کښې د عراق د عصائب اهل الحق غورځنګ د سیاسي دفتر غړي محمود الربیعي وویل په هیواد کښې د امریکا پوځیان د ترهګرو ډلو ملاتړي دي او د ترهګرو ډلو د شتون ختمیدل د امریکا د عسکرو له وتلو پرته امکان نلري .
د ویلو ده چې امریکا اوس بیا هڅې پیل کړي دي چې د سعودي عربستان ، متحده عربي اماراتو او د نورو عربو او اروپاي هیوادونو په مرستې سره په عراق کښې داعش ډله له سره منظم کړي چې دغه هیواد بیا له ناامنۍ او ګډوډیو سره مخامخ کړي .
