حاجیانو ته د اسلامي انقلاب د معظم رهبر مهم پیغام

د بیت الله الحرام زیارتوالو او حجیانو ته د رهبرۍ د ستر مقام حضرت ایت الله العظمی خامنه ای پیغام

درنو او محترمو اوریدونکو د خپرونې په دې برخه کې  حجیانو ته د رهبرۍ د ستر مقام حضرت ایت الله العظمی خامنه ای پیغام چې  نن سهار د عرفات  په دښته کې د ایرانیو حجیانو د سرپرست او د حج او زیارت په چارو کې د ولي فقیه د استازي  حجت الاسلام والمسلمین  نواب  له خوا ولوستل شو.  په دغه پیغام کې له مستکبرانو په تیره بیا امریکا برائت  له مظلوم وژنې او جنګ جوړونې  او د ترهه ګرۍ د مرکزونو منجمله داعش او بلیک واټر  او دهغوي له ملاتړو د برائت او د ماشوم وژونکي صهیونسټ رژیم او دهغوي له ملاتړو د برائت او بیزارۍ په توګه ګڼل شوی دی. د دغه  پیغام متن ته ستاسو پام غواړو:

بسم الله الرّحمن الرّحیم

والحمدلله ربّ العالمین و صلّی الله علی رسوله الکریم الامین، محمّد خاتم النّبیّین، و علی آله المطهّرین سیّما بقیّة الله فی الارضین، و علی اصحابه المنتجبین و من تبعهم باحسان الی یوم الدّین.

 د حج موسم  هر کال  په اسلامي امت د پالونکي د رحمت میعاد دی.  قرآني بلنه « وَ اَذِّن فِی النّاسِ بِالحَج»،(۱) په حقیقت کې په ټول تاریخ کې  درستو ته د رحمت په دغه دسترخوان د راتلو بلنه ده چې هم خدای پاله زړه او جان او هم عاقلانه فکر و نظر یې له برکتونو برخمن شي او هر کال  د حج درسونه او تعلیمونه د یو شمیر خلکو په  وسیله د اسلامي نړۍ ګوټ ګوټه ورسیږي.

  په حج کې  ذکر او عبودیت چې د وګړو او ټولنې  په روزنه، پرمختګ او لوړتګ کې اصلي توکی دی، د اجتماع او اتحاد په څنګ کې چې  د یوه امت بیلګه ده، او  په یو واحد مرکز  له حرکت سره یو ځای  او په یوه لاره کې  په ګډ هدف سره چې د توحید په اډاڼه  د امت د خوځښت او هڅې راز دی، او د حجیانو په یوشان والي او د توپیرونو په نیشتوالي سره چې  د تبعیضونو او فرقونو د ختمولو او د فرصتونو د شریکولو نښه ده، د اسلامي ټولنې  اصلي ستنې په یوې وړې شان بیلګې او مثال کې مونږ ته راښیي. د حج په اعمالو کې هر یو عمل لکه  احرام، طواف، سعي وقوف، رمي، حرکت او سکون  د هغه انځور یوې برخې ته سمبولیکه اشاره ده چې  اسلام له یوې مطلوبې اجتماع او ټولنې وړاندې کړی دی.

 له یوه بله د لرې پرتو هیوادونو او سیمو د خلکو تر مینځ د معلوماتو او اطلاعاتو تبادله، د تجربو او پوهو رسول، او د یوه بل له حال احواله خبریدل، د ناوړه تفاهمونو او بدګمانیو توږل، د زړونو نزدې کول او له ګډو دښمنانو سره د مقابلې لپاره د خپل توان او هڅې راغونډول، د حج ډیره لویه او حیاتي بریا ده چې  په سلګونو معمولو غونډو او اجتماعاتو سره  لاسته نه شي راوړل کیدی.

 د برائت دستورې چې  له ټولو ظلمونو، بدرنګیو او بې رحمیو او د هرې زمانې د طاغوتیانو له فسادونو  د بیزارۍ  او د زمانې د مستکبرانو  د زوروینو او قلنګ اخستنو په وړاندې  د ټټر وهلو په معنا دي،  د حج یو برکت او  د مظلومو مسلمانو ولسونو لپاره یو فرصت دی.  نن سبا د مستکبرانو او په سر کې یې د امریکا  د شرک او کفر له جبهې برائت، له جنګ جوړولو او مظلوم کشۍ د برائت په معنا دی؛ د ترهه ګرۍ د مرکزونو منجمله داعش او امریکا د غندلو په معنا دی؛ د ماشوم وژونکي صهیونسټ رژیم  او د هغوي د ملاتړو او ننګه ګوونکو په سر د غورځي وهلو په معنا دی؛ د اسیا او افریقا د شمال په حساسه سیمه کې د امریکا او دهغې د  انډیوالانو د جګړه ماریو د غندلو  په معنا دی چې د ولسونو مصیبتونه او کړاوونه یې اوج ته رسولې او هره ورځ  په هغوي درانه مصیبتونه نازلوي؛ د جغرافیا، نسل او د پوستکي د رنګ په اساس له توکم پالنې او توپیره د بیزارۍ په معنا دی؛ د هغه نجیبانه او عادلانه  او شرافتمندانه کړنو چې اسلام ورته ټول بللې دي په وړاندې د  تیري ګرو او فتنه ګرو له استکباري او خبیثانه  عملونو د بیزارۍ په معنا دی.

 دا د ابراهیمي حج یوازې یو څو برکتونه دي چې  سوچه اسلام ورته مونږ بللې یوو؛ او د اسلامي ټولنې د آیډیالونو د مهمې برخې یوه مجسمه بیلګه ده  چې هر کال  د ټولو مسلمانانو  په وسیله، د حج په هدایتکارۍ، یوه لویه او معنا داره ننداره جوړوي او په ګویا ژبه، ټول خلک د داسې یوې ټولنې د جوړیدو لپاره هڅو ته بلي.

 د اسلامي نړۍ نخبه او مهم کسان چې له مختلفو هیوادونو یې یو شمیر  همدا اوس د حج په دستورو کې شریک دي،  ډیره درنه او لویه دنده په غاړه لري. دغه درسونه باید  د هغوي په نوښت او همت  ټولو ولسونو او عمومي افکارو ته ورسیږي  او د افکارو، محرکاتو، تجربو او پوهو معنوي راکړه ورکړه باید دهغوي په لاس  تحقق ومومي.

 نن سبا د اسلامي نړۍ یوه مهمه مساله د فلسطین مساله ده چې  د هر مذهب، توکم او ژبې د مسلمان د ټولو سیاسي مسایلو په سر کې ده.  د وروستیو پیړیو تر ټولو لوی ظلم په فلسطین کې شوی دی. په دې دردوونکې کیسه کې،  د یو ولس  هر څه، وطن یې، کور اور او مال جایداد یې، عزت او شناخت یې تروړل شوې دي. دغه ولس د خدای په فضل  ماته نه ده خوړلې او نه دی ناست او نن تر  پرونه په زیاتې میړانې او ولولې سره په میدان کې دی؛ خو د کار د نتیجې لپاره د ټولو مسلمانانو مرسته ضروري ده.  د پيړۍ د معاملې چل چې  د ظالمې امریکا او د هغې د خاینو انډیوالانو لخوا ورته زمینه برابریږي،  نه یوازې د فلسطین له ولس بلکې د بشري ټولنې په حق کې یو جنایت دی. مونږ ټول د دښمن د دغه مکر او چل ول مقابلې ته راغواړو او د خدای په مرسته او قوت سره هغه  او د  استکبار د جبهې ټول چلولونه  د مقاومت د جبهې د همت او ایمان په وړاندې ماته خوړونکې ګڼو.

 قال الله العزیز: اَم یُریدونَ کَیدًا فَالَّذینَ کَفَروا هُمُ المَکیدون.(۲) صدق الله العلیّ العظیم.

له خدایه د ټولو محترمو حجیانو لپاره د طاعتونو د قبلیدو، روغ صحت او  رحمت توفیق  غواړم.

سیّدعلی خامنه‌ای   

د ۱۳۹۸ هجري لمریز کال د زمري څوارلسمه،

د ۱۴۴۰ هجري سپوږمیز کال د ذی الحجې دریمه نیټه.