Vuçiq: Kurti do ta shfrytëzojë Këshillin e Evropës për të paditur Serbinë
Presidenti i Serbisë, Aleksandar Vuçiq, ka thënë sot se kryeministri i Kosovës, Albin Kurti po kërcënon Serbinë me padi për gjenocid pikërisht tani, sepse dëshiron të përdorë institucionet e Këshillit të Evropës (KE) dhe përmes tyre të nisë padi kundër Serbisë.
“Është pjesë e një plani masiv për sulme dhe presion ndaj popullit serb dhe Serbisë. Do të durojmë dhe do të fitojmë”, citohet të ketë thënë Vuçiq gjatë një vizite në njësitë në aeroportin ushtarak në Batajnicë, shkruajnë mediat serbe.
Ai ka pretenduar se një sjellje të tillë Kurtit ia kanë mundësuar pak ditë më parë raportuesja për Kosovën, Dora Bakoyani dhe vendet perëndimore duke rekomanduar që Kosova të anëtarësohet në KiE.
Siç ka thënë më tej Vuçiq, Kurti ka pritur deri më tani që një shtet tjetër të bëjë padi për gjenocid sepse Kosova nuk njihet nga Kombet e Bashkuara dhe nuk mund të bëjë padi në Gjykatën Penale Ndërkombëtare.
Ndërsa Kryeministri i Kosovës Albin Kurti ka akuzuar sot Serbinë se po vazhdon të mohojë krimet e kryera ndaj shqiptarëve nga forcat e saj kriminale edhe 25 vjet pas përfundimit të luftës në Kosovë.
“Ende mungon pranimi i së vërtetës nga Serbia dhe drejtësia për krimet e kryera gjatë luftës në Kosovë. Si Qeveri e Republikës së Kosovës, ritheksojmë zotimin tonë për të mos reshtur së kërkuari ndriçimin e së vërtetës dhe drejtësi për krimet e luftës,” ka shkruar Kurti në Facebook.
