Presidenti Raisi bën thirrje për unitet të myslimanëve kundër krimeve izraelite

Presidenti iranian Ebrahim Raisi ka bërë thirrje për një unitet në botën myslimane kundër krimeve të regjimit izraelit pasi forcat pushtuese sioniste sulmuan besimtarët e pambrojtur në xhaminë al-Aksa.

Gjatë një bisede telefonike me homologun e tij turk Rexhep Tajip Erdogan të premten, Raisi kritikoi ashpër sulmet e fundit të forcave izraelite kundër xhamisë al-Aksa si një përdhosje e këtij vendi të shenjtë. Ai gjithashtu kritikoi agresionet izraelite ndaj Sirisë dhe Libanit. Raisi përsëriti thirrjen për mbajtjen e një takimi urgjent të Organizatës së Bashkëpunimit Islamik (OBI) për të diskutuar mënyrat për t'u përballur me veprimet brutale të regjimit izraelit. Duke theksuar nevojën për të respektuar integritetin territorial të vendeve të rajonit, Presidenti iranian tha se qasja më e rëndësishme për të përballuar terrorizmin dhe separatizmin është mbështetja e sovranitetit kombëtar të shteteve. Nga ana e tij, Erdogan bëri thirrje për unitet mysliman për të mbështetur Palestinën. "Bota islame duhet të jetë e bashkuar kundër sulmeve të Izraelit në Palestinë," tha ai, njoftoi Drejtoria e Komunikimeve e Presidencës Turke. Duke vënë në dukje se të menduarit e arsyeshëm mund të parandalojë një cikël të ri dhune në Palestinë, Erdogan tha se adoptimi i sensit të përbashkët do të jetë i dobishëm për të gjitha palët. Ai gjithashtu i bëri thirrje Teheranit që të vazhdojë përpjekjet për të ruajtur statusin e vendeve të shenjta, duke përfshirë xhaminë al-Aksa, në organizatat ndërkombëtare.