Amerika nuk ka në plan të largohet nga Lindja e Mesme

Forcat Demokratike Siriane (SDF) njoftuan se trupat amerikane të tërhequra nga Afganistani dhe Iraku do të transferohen në bazat e koalicionit ndërkombëtar në lindje të Eufratit në Siri.

SDF njoftoi se kishte filluar punën për të zgjeruar pistën ajrore për avionët e koalicionit ndërkombëtar të udhëhequr nga Shtetet e Bashkuara. Duhet të theksohet se shumica e zonave të provincave të Hasake, Deir ez-Zor dhe Raka janë nën kontrollin e Forcave Demokratike Siriane të mbështetura nga Shtetet e Bashkuara. Prania ilegale e elementëve amerikanë në Sirinë lindore dhe verilindore është për shkak të burimeve të mëdha të naftës. Ka pasur shumë raporte të plaçkitjes së naftës siriane në këto zona. Qeveria Siriane gjithmonë ka insistuar që prania amerikane në rajon ishte e paligjshme dhe se do t'i jepte fund këtij okupimi. Në të njëjtën kohë, sipas raporteve, ushtria amerikane ka dislokuar një dërgesë të re të logjistikës dhe pajisjeve ushtarake në Sirinë verilindore. Burimet lokale në fshatin al-Sveidiya, pranë qytetit al-Shaddadi në verilindje të Sirisë, raportuan se një autokolonë ushtarake e SHBA me 24 kamionë hyri në këtë zonë. Burimet i thanë Agjencisë Zyrtare Siriane të Lajmeve (SANA) se kamionët hynë në këtë vend përmes kalimit të paligjshëm al-Walid përmes Sirisë verilindore. Sipas të njëjtave burime, autokolona që transportonte armë dhe municion lëvizte nga Rmelan në Kamishli dhe më pas mbërriti në bazat amerikane në jug të provincës. Nga ana tjetër, Abu Ali al-Askari, shefi i sigurisë i brigadave Hezbollah të Irakut, i cituar nga Alforat News tha se prania e forcave okupuese, që veprojnë nën kujdesin e NATO-s në Irak, do të rrisë sulmet e grupeve të rezistencës kundër pushtuesve. Al-Askari, duke iu referuar veprimeve armiqësore të Shteteve të Bashkuara, regjimit sionist dhe Arabisë Saudite në Irak, gjithashtu tha: "Ne shpresojmë që Parlamenti Irakian të përballet me mercenarë të cilët ndërmarrin veprime brenda kornizës së sektarizmit. " Shefi i sigurimit të brigadave Hezbollah të Irakut në këtë drejtim theksoi: “Trekëndëshi Izrael/ SHBA / Arabia Saudite është përgjegjës për intensifikimin e sulmeve kriminale kundër civilëve dhe forcave të sigurimit të Irakut. " Mohammad Karim, anëtar i Parlamentit Irakian kritikoi me forcë vazhdimin e pranisë ushtarake amerikane në Irak duke shtuar se sipas rezolutës së miratuar nga Parlamenti Irakian, trupat amerikane janë të detyruara të largohen nga Iraku. Deputeti i Parlamentit Irakian shtoi: "Shtetet e Bashkuara aktualisht po kërkojnë të shtrijnë praninë e tyre në tokën irakiane dhe ne po paralajmërojmë qeverinë irakiane në lidhje me këtë. " "Objektivi i Amerikës në mbajtjen e trupave të saj në tokën irakiane është të garantojë interesat e Uashingtonit në rajon," shtoi ai. Më parë, Hadi al-Amiri, udhëheqës i koalicionit al-Fath në Irak, tha: “Lidhur me trupat amerikane në Irak, pozicioni i koalicionit al-Fath është shumë i qartë. Ne besojmë se ata duhet të largohen nga Iraku. "