Gjermani: Shkarkohet drejtuesja e Zyrës Federale të Migracionit dhe Refugjatëve

Ministri i Brendshëm gjerman Horst Seehofer shkarkoi nga detyra drejtuesen e Zyrës Federale të Migracionit dhe Refugjatëve, Jutta Cordt dhe zëvendësin e saj Ralph Tiesler pas skandalit të ryshfetit për azil, njoftuan mediat gjermane të premten duke cituar Ministrinë e Brendshme.

Skandali i korrupsionit shpërtheu në prill pasi disa punonjës në Zyrën Federale të Migracionit dhe Refugjatëve në Bremen u akuzuan për marrjen e ryshfetit në këmbim të dhënies së rreth 1200 lejeve për azil refugjatëve, të cilët nuk plotësuan kriteret e pranimit të azilit. Skandali për vendimet e manipuluara të azilit të Zyrës Federale të Migracionit dhe Refugjatëve (BAMF) pati shtruar pyetjen, nëse Gjermania nuk ka qenë vërtet e ngarkuar me shtimin e numrit të refugjatëve. Por, sipas njoftimeve të mediave numri i lartë i azileve të dhëna në zyrën e BAMF në Bremen, mund të ketë patur edhe arsye të tjera.